Оглавление

ПРЕДИСЛОВИЕ

О молитве архимандрита Софрония

Отверзу уста моя,

и наполнятся духа...

Вся жизнь старца Софрония была непрестанным стремлением ко Свету Лица Божия, к «Тому, Кто Есть» (Исх. 3, 22). Подобно Моисею десятилетиями он взывал к Богу со слезами: «Яви мне Лице Твое!». Неутолимая жажда проникнуть в тайны Божественного Бытия не умалилась до глубокой старости отца Софрония. Иными словами, вся жизнь его была наполнена молитвой, болезненным исканием пути к нашему Творцу, чтобы вопросить Его: «Для чего Ты создал меня?» Отражением живого предстояния старца перед Вечным и Живым Богом являются молитвы, помещенные в этой книге. Однако они дают лишь частичное представление о той глубокой молитвенной жизни, которая текла в нем.

Молитва для старца была всеобъемлющей. Поводом к ней служило все, что окружало подвижника. Его молитва простиралась к Богу обо всем. Каждое движение, каждое действие он начинал и заканчивал с чувством Божественного присутствия. Сознанием этого освящалось все. Вокруг подвижника создавалась напряженная атмосфера непорочной святости, выраженной в словах преп. Серафима: «Стяжи дух мирен, и вокруг тебя спасутся тысячи». Писал ли он иконы, беседовал ли он с людьми или просто гулял – он «совершал святыню во страсе Божием». Для него не было малых, ничего не значащих вещей, поскольку он воспринимал все и всех через призму молитвы, в присносущном Свете спасения Христова. При беседе со старцем часто возникало ощущение того, что он и слушает тебя, и одновременно предстоит духом пред Богом, и прислушивается к сердцу, что откроет ему Святой Дух.

Старец Софроний говорил: «Великого Бога нужно просить о великом». Действительно, в его молитвах поразительным является его свободное, дерзновенное, но никогда не бывающее дерзким, обращение к Спасителю. Интимное чувство Бога и стремление к общению с Ним через молитву было присуще ему от младенчества. Старец рассказывал, как будучи маленьким ребенком, он мог подолгу молиться, стоя на коленях у своей детской кровати. В течение всей жизни сознавая себя во мраке непонимания путей Божиих и томясь от зрелища трагедии человеческих судеб, подобно Иакову и Иову, он боролся через молитву за стяжание подлинного богопознания и вообще ведения о конечном СМЫСЛЕ БЫТИЯ, взывая: «Душе Святый, прииди и вселися в ны: напой нас, жаждущия, таинственными струями познания Твоего, и изведи из темницы греховныя души наша». Подобно древним пророкам, и он беседовал с Богом лицом к Лицу, при этом до глубокой старости его никогда не переставало сокрушать сознание своего ничтожества и беспомощности. До последнего издыхания он приступал к Богу со страхом, боясь даже малейшим движением сердца оскорбить Духа Божия. Исходным началом его молитвы всегда являлось видение Христа «как Он есть», как Он открылся нам в деле спасения, рождающее болезненное чувство своей отчужденности от ТАКОГО Святого Бога и смертельное томление оттого, что «мы в тисках греховной смерти, и истинная жизнь нам не дана». Именно это благодатное отчаяние, идущее дальше всякого отчаяния и рождающее молитвенный крик из сердца, влекло старца десятилетиями внутренне «кричать» к «Могущему спасти» от этой смерти, «и услышан бысть за благоволение».

Старец познал и открыл нам, что путь к истинному Бытию лежит через молитву, подобную Гефсиманской, в которой жертва любви приносится до конца. Лишь тогда человек во Христе и чрез Христа может сказать: «Ныне и аз есмь».

К этому переходу от смерти и тления страстей к жизни, всецело освященной заповедями Христовыми, была устремлена его молитва с чрезвычайным напряжением. Старец постоянно повторял, что «молитвою все исцеляется, все исправляется, все очищается, все обновляется», и поэтому для него не существовало безнадежных ситуаций. Единственным и верным путем к разрешению и преодолению всех проблем он считал такую «безумную», отчаянную молитву, исходящую из нашего бедственного положения. В любых обстоятельствах старец поощрял внутренне «кричать» к Богу с болезненным сердцем:

Господи, Боже Спасителю мой, благосклонно приклони ухо Твое к молению моему: Ты зриши, как греховная смерть поглощает всего меня; молю Тя: исцели сердце мое, исцели ум мой, исцели душу мою, исцели все мое бытие благоволением Твоим, за молитвы отца моего духовнаго. Аминь.

В опыте старца молитва была живым общением с Живым Богом, и как таковая, она принимала бесконечно разные формы, соответствующие разным состояниям молящегося. Он говорил: «Всегда начинайте молитву, рассказав Богу о своем положении». Как глубоко личный и интимный акт, молитва не подлежит никаким внешним законам или ограничениям, она должна быть внутренней бытийной необходимостью и должна совершаться в духовной свободе. Поэтому уставная молитва в его глазах имела лишь предварительное, педагогическое значение, несомненно ценное, особенно в начале, для того, чтобы проникнуться правильным молитвенным духом Православной Церкви, однако далеко недостаточное для того, чтобы довести человека до состояния мужа совершеннаго, в меру полнаго возраста Христова, для того, чтобы Бог был вся во всех. «Молитва – есть внутренний акт нашего духа. Выражаться он может в самых различных формах. Нередко и даже, может быть, особенно часто в молчании нашем пред Богом. Молчим, потому что Бог ведает всю глубину нашей мысли, все чаяния нашего сердца, а выражать их словами мы не всегда способны. Бог же разумеет тайные движения нашего сердца и отвечает на них... Предстоять пред Богом – вовсе не значит стоять перед иконами, но чувствовать Его в своем глубоком сознании как наполняющего Собою все. Жить Его как воистину Первую Реальность, после которой следует мир, в порядке низшей, второй, производной, тварной реальности. Для этого может быть пригодным всякое положение тела: лежачее, ходячее, сидячее, стоячее и тому подобное».^[1] Именно поэтому старец не любил давать молитвенных правил. Он до конца доверял каждому человеку, видя в нем самые совершенные, самые высшие потенциальные возможности, и хотел через эту свободу довести каждого до осознания личной ответственности перед Богом. «Чтобы найти верный путь, лучше всего просить об этом Бога в молитве: “Господи, Ты сам научи меня всему. Дай мне радость познания воли Твоей и путей Твоих. Научи меня воистину любить Тебя всем моим существом, как Ты заповедал нам. Устрой мою жизнь так, как Сам Ты в предвечном совете Твоем мыслил о мне... да, даже о мне, ибо Ты никого не забыл и никого не создал на погибель. Я безумно растратил(а) данные Тобою мне силы, но теперь, при конце моей жизни, Ты все Сам исправь, и Сам всему научи меня, но так, чтобы действительно Твоя воля совершилась в жизни моей, разумею я о том, или не разумею до времени. Не попусти меня ходить чужими путями, ведущими во тьму, но прежде чем усну смертным сном, дай мне, недостойному(ой), увидеть Свет Твой, о Свете мира.” И так своими словами молись все о том же. Пройдет некоторое время, и сила слов этих проникнет во внутрь существа твоего, и тогда потечет жизнь сама собою именно так, как хочет Господь, а внешне рассуждая ничего мы не решим».^[2]

Для старца молитва, будучи вселенским и всеобъемлющим актом — в пространстве и во времени, достигала своей кульминации в совершении Божественной Литургии, ради которой все совершалось и которая являлась средоточием всего дня и источником живой силы для него. «Литургическая молитва с частым причащением — полнота. Правда, для этого необходимо ее жить и разуметь. Тогда откроется, что Литургия объемлет собою всю жизнь нашу; в ней заключены все планы нашего бытия в его обращенности к Богу. Литургия, если только она живется всем нашим существом, дает нам жить ее как воистину Божественный Акт, вмещающий не только весь этот видимый мир, но и выходящий безмерно за его пределы».^[3] Как литургическое священнодействие, его молитва всецело была обращена ко Христу-Спасителю, и через Него к Отцу и Духу Святому. Она непрестанно вдохновлялась видением великого дела спасения мира во Христе, обнимая все бытие — и Божественное и человеческое — в акте жертвенной христоподобной любви. Молитву старца Софрония характеризует то, что она неразрывно связана с его боговидением, с его глубоким и ясным догматическим сознанием. Именно такая молитва есть истинное богословие, по его любимому выражению, как «состояние нашего духа, непосредственно созерцающего небесную действительность, и содержание нашей молитвы», в которой открываются тайны путей ко спасению. Самый яркий и дивный пример тому он усматривал в Евангелии от Иоанна. Поэтому старец безмерно любил молитвы Пятидесятницы, Богородичные Догматики, но особенно Анафору Литургии Василия Великого, на которую он часто ссылался, как на самый совершенный образец того состояния, когда созерцание прелагается в молитвенную форму, которая постоянно питала его собственную молитву.

В молитве, приносимой в подобающем духе, старец видел акт вечной ценности, и поэтому он переживал каждое молитвенное действие как новое событие. Мы можем забыть, что мы молились, и о чем молились, но энергия молитвы пребывает в Боге и совосстанет с нами в день воскресения.

Он также говорил, что «молитва действует медленно и благородно». Ее действие может быть моментальным, но оно также может произойти через пять, десять, или двадцать лет после того, как помолился человек, ведь ни один молитвенный вздох не пропадает пред Богом. Так он видел, например, во всемирном и любовном почитании в наши дни преп. Серафима Саровского плод его покаянного подвига на камне, доселе тайно действующего в мире. Прежде всего, он часто указывал на непрекращающееся действие Гефсиманского моления Господа нашего Иисуса Христа, на Его живое и животворящее присутствие в бытии мира с тех пор, как оно было принесено и, как Свет Любви Божественной, стало содержанием славословия небесных сил и неотъемлемым и спасительным достоянием всех сынов Адама.

Большинство публикуемых в книге молитв было написано во время пребывания старца в Сент-Женевьев-де-Буа под Парижем, где он поселился по возвращении с Афона и жил с 1946 по 1959 год. Многие из них — простые наброски, поскольку старец никогда не имел времени, ни свободы обрабатывать и отредактировать их: «Все, что я написал — я всегда писал где-то в поезде, на краю стола, в полночь, полубольной. У меня никогда не было подходящих условий для такой работы». Однако про ту пору старец говорил, что у него было такое вдохновение, что молитвы сами выливались на бумагу. С одной стороны, в силу того, что сразу после Афонской пустыни он находился тогда в исключительно благоприятном духовном состоянии «бесстрастия», и быть может еще потому, что тот период был для него чрезвычайно тяжким и полным разных скорбей и испытаний: крайняя нищета, немощь и болезнь телесная, и многое другое, — удручали его. Во многих его молитвах слышны отголоски тех острых терзаний, которые, несомненно, углубляли его крик к Богу: «Тонкая ткань сердца моего болезненно раздирается, и изнемогает душа моя во еже тещи вслед стопам Твоим... Помяни болезни наша и скорби, труды и злострадания, и по множеству скорбей и воздыханий наших, умножи милость Твою на нас...»

Для старца молитва была лишь иным названием ТВОРЧЕСТВА. Как действие Духа Святого, «Жизни Подателя», в сердце, она стремилась животворить весь окружающий мир, предавая всякому обстоятельству вечное вселенское измерение. Старец обладал редкой и поразительной творческой силой, которая выражалась во всех областях жизни — как духовной, так и практической, вплоть до мелочей. Строил ли он храм или монастырь, писал ли он книги, молитвы или иконы, и, прежде всего, утешая и наставляя души человеческие, он стремился создать нечто новое, соответствующее его ясному богословскому видению целостности бытия. Ввиду этого существует удивительно гармоничное соотношение между всеми его произведениями: литургическими, иконописными и писательскими, где чувствуется один и тот же дух, но в разных формах. Старец любил сравнивать молитвенную жизнь с водой: то тихо, бесшумно текущей, то внезапно бушующей, то опять зеркально спокойной и отражающей небесный свет. Как живая вода, его молитва подвергалась бесконечным вариациям, следуя вдохновению его духа. Этим можно объяснить наличие разных вариантов одной и той же молитвы. Даже Иисусову молитву старец любил разнообразить, вставляя то или иное слово, чтобы придать ей больший объем: «Господи Иисусе Христе, Сыне Божий, Сыне Отечь, вземляй грех мира, помилуй нас... Господи Иисусе Христе, седяй одесную Отца, помилуй нас и мир Твой... Господи Иисусе Христе, милостив буди нам, грешным».

Другой выразительный пример этой молитвенной свободы можно видеть в том, как в последнее время своей жизни, сокрушенный угасанием веры в сердцах людей во всем мире, старец читал Трисвятое так: «Святый Боже, Святый Крепкий, Святый Безсмертный и ВЕРНЫЙ, помилуй нас». Однако здесь следует отметить, что этот свободный творческий процесс всегда происходил у отца Софрония в рамках предания Православной Церкви. Старец дорожил ее дивным литургическим богатством, многие тексты которого он знал наизусть, но он также говорил, что в наше время нужно писать новые молитвы, так как «Требник» уже не покрывает всех нужд нашей эпохи. Составляя новые молитвы, он заботился о том, чтобы оживить, возобновить притупившееся от постоянного повторения чувство молящихся. Так, например, были написаны им «Пятерицы» литургических молитв для приготовления ко Причащению, по схеме, найденной у преп. Симеона Нового Богослова. Вот как он сам пишет о них:

«Мысль вовлечь в более тесное участие народ в совершаемое (литургическое) таинство несомненно правильна. Я лично нашел полезным совершить это несколько иным образом. А именно, в том месте, где обычно принято читать дополнительные молитвы или прошения на Литургии, то есть после Евангелия, я стал добавлять некоторые прошения и затем молитву, приготавливающие к таинству, чтобы помочь предстоящим перед самым важным моментом Литургического канона собраться и внутрь себя, и воедино с иереем. Посылаю тебе эти тексты. У меня пока их пять. Каждый из них я читаю целиком на Литургии, меняя последовательность, чтобы разнообразить несколько. Дело в том, что если ограничиться одним текстом, строго фиксированным, тогда пришлось бы или очень удлинять его, или лишиться многих слов, которые, в общем, желательны. Даже у нас, в нашей маленькой церковке, приходится считаться со временем. Обычно наша Литургия занимает два с половиной часа... Я позволил себе ввести эти молитвы, которые, как ты видишь, составлены из текстов других литургических молитв, тайных и нетайных, с тем, чтобы оживить внимание, притупляющееся иногда от повторения одной и той же формулы. Есть у меня и другие молитвы, за усопших, за больных, и проч.»^[4]

Старец очень бережно и благоговейно относился к слову, так как он глубоко ощущал творческую силу всякого молитвенного действия, совершаемого с должным вниманием и напряжением. Он сам до конца жизни старался произносить всякое слово четко и ясно, с полным сознанием того, что говорится. Он настаивал, чтобы никогда не упускали из виду бытийного измерения молитвы, обращенной к Единому, воистину Сущему Богу, и не сводили ее к простому вычитыванию, поскольку критерием истинности молитвы является болезнь сердца, и плач, указывающий на то, что молитва наша достигла своей цели. Этот священный и страшный характер всякого молитвенного призывания особенно чувствовался, когда он читал Иисусову молитву.

Он произносил слова медлительно, напряженно, как смиренный стон из сердца, и в благоговейном чувстве того, что это — Имя Того, Имже вся быша и без Него ничтоже бысть, еже бысть. Он всегда советовал читать молитвы медленно, повторяя слова, делая паузы, для того, чтобы дух молитвы проникал вглубь и касался сердца: «Если твой ум и сердце испытывают молитвенное настроение при чтении Св. Писания, то ты оставайся в этом, доколе не прекратится это молитвенное настроение. Правило такое: всякое слово, всякое положение, при котором ум и сердце соединяются в единой жизни памяти Божией, не должно изменять, пока не утомится ум или сердце или тело».^[5]

На прочтение одной молитвы у старца уходило весьма долгое время. Он вообще предпочитал краткие молитвы, как отчаянные сердечные вопли, а длинные, которых, впрочем, немало среди его собственных молитв, он советовал разделять на части, так как внимание наше не выдерживает чрезмерного напряжения, и нам нужны перерывы. «Кто может чисто молиться два часа, — говорил он, — у того непрестанная молитва. Два часа — это мера совершенных».

Драгоценным и необходимым условием для молитвы и для христианской жизни вообще старец считал вдохновение, к которому он часто возвращался в беседах. Он имел в виду то состояние, когда молящемуся человеку открывается в Духе Святом непостижимый Образ Христа-Бога, Который святою красотою Своею и непорочным совершенством Своим пламенно влечет душу уподобиться Ему. В молитве, как и в прочих аспектах жизни, принцип подвижника состоял в том, чтобы возвести ум и сердце человека именно к этой последней цели, к тому совершенству, к которому все призваны во Христе и которое выражено, по словам преп. Серафима, в «стяжании Святого Духа». Поэтому критерием того или другого молитвенного делания отец Софроний считал умножение в нас познания путей спасения и смиренного духа Христовой любви. «Когда вы говорите с людьми, не останавливайтесь на маленьких вещах. Надо их поставить перед глубокими вопросами. Так надо лечить людей: показать им вечный свет Слова Христова».

«Весь смысл жизни в том, чтобы ум наш и сердце жили Богом; чтобы Бог стал нашей жизнью. Этого Он только и ищет. Для этого мы и созданы, чтобы жить Его жизнью, и при том во всей ее беспредельности... Это слово может нас пугать, когда мы видим наше настоящее жалкое состояние, но это так, и веру эту не надо терять. Одна из наибольших опасностей — снизить и умалить замысел Божий о человеке. Всякое наше страдание, даже неправое, знает Бог. Знает, и сострадает нам. С Ним необходимо установить “личные” отношения; почти “человеческие”... Я надеюсь, что ты меня понимаешь. Понимаешь, что под этим я разумею внутреннюю, интимную связь с Богом. Ибо к жизни в Нем призван весь человек, то есть не только его высшая способность созерцания — “дух”, но и чувства — “душа”, и даже тело».^[6]

Вдохновенный таким видением, человек не замечает мелочей, говорил старец, ведь все его внимание молитвенно устремлено ко Христу, и он не может грешить. Тогда жизнь течет просто, естественно, но из-за молитвенного напряжения одновременно и безгрешно, и свято, а без вдохновения — все скучно, уныло, мертво, и греха не избежать. Старец говорил: «Сердце христианина-монаха должно быть подобно вулкану. Чуть затронешь, и польется горячая лава». Так и было со старцем. Он, бывало, начнет читать: «Отче наш», а дальше — не может, потому что его душат слезы.

Как и вся его жизнь, молитвенный облик старца был прост, естественен, в нем не было ничего «театрального», ибо он более всего любил и ценил святую монашескую строгость во всем и ту царственную свободу духа, ни от каких внешних обстоятельств или принуждения не зависящую. Жизнь его духа была действительно «сокровенна со Христом в Боге», и проходила в «тайной клети» сердца. Лишь в последние его месяцы приоткрылась она, и нам дано было видеть, лишь отчасти, как он плакал поистине Гефсиманским плачем.

Незадолго до смерти старец часто повторял: «У меня нет больше слов; я все сказал Богу». И на самом деле, в то время его молитва шла дальше всяких слов, которые, как и всякое человеческое явление, ограничены, и претворялась в «неизглаголанные воздыхания» сердца, в безмолвное предстояние его духа, плененного видением Христа, молящегося в Гефсимании и восходящего на Голгофу. В таком-то состоянии он достигал подлинного созерцания, «когда небесные реальности становятся очевидными для нашего духа». И когда умиление переходило некую грань, тогда его немощное, престарелое тело едва выдерживало напор плача. В те моменты он мог умереть от чрезвычайной боли.

В такой молитве, повторяя со слезами слова: «Господи, приими душу мою...», старец Софроний перешел от смерти в жизнь нестареемую во Свете возлюбленного им Христа. Мы же ныне с твердым упованием о том, что старец в неизреченном смирении предстоит Святой Троице и, по обещанию своему, ходатайствует о мире, о котором он так долго и глубоко болезновал, благодарные за все «моления же и молитвы, которые он с воплем крепким и многими слезами» принес Богу о каждом из нас в жизни сей, всеблагоговейно возносим свою молитву о нем:

Со святыми упокой, Христе, преподобнаго раба Твоего, и молитвами его помилуй нас и мир Твой.

Аминь.

Схиигумен Серафим (Барадель)

МОЛИТВЫ КАЖДОДНЕВНЫЕ

Утренняя молитва^[7]

БОЖЕ ВЕЧНЫЙ, Царю Святый, Творче небу и земли, Иисусе Христе, Отца безначальнаго собезначальный Сыне, неизследованною благостию призвавый мя от небытия в жизнь сию, даровавый ми благодать крещения и Свышняго пакирождения, положивый печать Духа Твоего Святаго на уды тела моего; Ты бо вложил еси в сердце мое желание взыскати Тя, Единаго истиннаго Бога, услыши и ныне молитву мою.

Ни жизни, ни света, ни радости не имам, разве Тебе, Боже. Несмь достоин воззрети на Тя, от множества грехов моих, но, якоже рекл еси учеником Твоим, яко вся елика аще воспросите в молитве, верующе, приимете и еже аще что просите во имя Мое, то сотворю, дерзая призываю Тебе: очисти мя от всякия скверны плоти и духа и научи мя како достоит молити Тя.

БЛАГОСЛОВИ день сей, егоже дал еси ми, недостойному рабу Твоему, и силою благословения Твоего сподоби мя, на всякое время и во всяком месте, сердцем чистым глаголати и делати во славу Твою, с терпением, смиренномудрием и любовию, в духе мира, кротости, великодушия и премудрости, и предзрети Тя предо мною выну.

СКАЖИ МНЕ, ГОСПОДИ, путь воли Твоея, по безмерной благости Твоей, и даруй мне непорочно ходити пред Лицем Твоим. Ты, мирный Царю, испытуяй сердца и утробы, веси всю нищету мою и безумие; Ты веси ослепление мое и неведение, но и желание сердца моего зриши, и болезни и скорби души моея не скрыты пред Тобою.

ВОНМИ убо молению моему, и Духом Твоим Святым настави мя на землю праву. Елижды аще растленная воля моя поведет мя на чуждыя стези, тогда молю Тя, не щади мене, но нуждею возврати мя паки на путь святых Твоих заповедей. Силою любве Твоея даждь ми последовати стопам Твоим аможе аще пойдеши. Сохрани мя от всякаго дела и слова душетленнаго, от всякаго движения сердца и ума моего, могущаго печалити Духа Твоего Святаго или брата моего огорчати. Научи мя, что ми подобает глаголати и како подобает глаголати. Аще же есть воля Твоя, да умолкну, вразуми мя молчати в духе мира, никакоже оскорбляющи, ниже смущающи ближняго моего.

Законоположи мя в путех оправданий Твоих и, даже до последняго моего издыхания, не попусти ми уклонитися от света Твоих повелений, яко да будут заповеди Твои единым законом всего моего бытия: и временнаго, и вечнаго.

ЕЙ, ТВОРЧЕ МОЙ БЛАГИЙ, умилосердися о мне, падшем создании Твоем, ущедри мя во смирении и скорби моей, и не скрый от мене путей спасения Твоего.

О мнозем и велицем молю Тя, Боже мой, но развращения и непотребства моего не забых. Темже помилуй мя и не отвержи мене от Лица Твоего дерзновения ради моего, наипаче умножи во мне сие святое дерзновение. И сподоби мя, сквернша паче всех человек, любити Тя, якоже заповедал еси нам: от всего сердца, от всея души, всем помышлением и всею крепостию. Всем существом моим да возлюблю Тя.

ЕЙ, ГОСПОДИ ЦАРЮ, Духом Твоим Святым научи мя благоразсуждению и разуму. Даждь ми познати истину Твою, прежде даже не сниду во гроб. Продли дни моя в мире сем, дондеже принесу Ти плоды достойны покаяния. Не восхити мене в преполовение дней моих, или во омрачении ума моего. Егда же благоволиши положите конец окаянному житию моему, предупреди мене, да уготовится душа моя усрести Тя.

В тот великий день, в тот страшный час, пребуди со мною, Господи, и воздаждь ми неизреченную радость спасения Твоего. От тайных моих очисти мя и от всякаго беззакония таящагося во мне, и добрый ответ даруй ми принести Тебе на Страшнем Судищи Твоем.

ЕЙ, ГОСПОДИ, по велицей милости Твоей и безмерному человеколюбию Твоему, услыши молитву мою.

Аминь.

Молитва на всяк день

ГОСПОДИ БОЖЕ МОЙ, призри на нищету мою и падение мое. От юности осквернен есмь всякими грехами, и не смею возвести очи мои к Тебе, ниже отверсти скверная уста моя к призыванию святаго и страшнаго Имене Твоего. Но паки отнюд не призывати Тебе не могу, яко не имам иныя жизни, инаго света, иныя радости, иныя мудрости, иныя крепости разве Тебе Единаго, Боже мой. Темже, дерзая на милость Твою, молю Тя: сподоби мя призывати Тебе, яко Сам Ты заповедал еси учеником Твоим вся просити во Имя Твое. Силою святаго и страшнаго Имене Твоего, очисти мя от всякия скверны плоти и духа, и даждь ми молити Тя, якоже достоит. Но Ты зриши, Господи, яко не вем, како подобает молитися. Ты еси Бог мой от чрева матере моея, но пути, ведущаго к Тебе, не обретох; и доселе во время старости моея, пребываю в тьме неведения. Но ныне, егда приблизися кончина моя, егда готовится душа моя снити во вечный мрак ада, помилуй мя, пощади мя, и Сам Ты, Спасе мой, Духом Твоим Святым научи мя молити Тя. Подобно разслабленному, глаголавшему Ти: не имам человека, и аз призываю Тя — прииди ко мне, оставленному, заблудшему, безпомощному, и Сам Ты буди ми вся.

ГОСПОДИ, ИИСУСЕ ХРИСТЕ, помилуй мя, пощади мя, научи мя, утверди мя на пути заповедей Твоих.

Аминь.

Молитва иная

ГОСПОДИ ИИСУСЕ ХРИСТЕ, Единородный Сыне безначальнаго Твоего Отца, отверзи очи омраченной души моея, яко да и аз разумно узрю Тебя, Творца и Бога моего. Молю Тебя: не отвержи мене от Лица Твоего, но презрев все мое окаянство, всю мою низость, яви мне Свет Твой, о Свете мира; и даждь ми познати любовь Твою к человеку. О сладчайший Христе, от Отца низпославый на святыя Твоя ученики и апостолы Духа Святаго, Сего, Благий, низпосли и на мя, недостойнаго, и тем научи мя познанию Твоему, и открый ми пути спасения Твоего. Возсияй ми, Боже, Боже мой, Свет Твой истинный, яко да во Свете Твоем узрю и аз славу Твою, яко Единороднаго от Отца, и да вообразится внутрь мене Твой непостижимый образ, по немуже создал еси человека. О Боже, Спасителю мой, свет ума моего и крепость души моея, да вселится в мя доброта Твоя, да пребуду и аз непрестанно в Тебе, присно нося в себе Духа Твоего Святаго, Иже да даст ми уподобитися Тебе, Единому Господу моему, якоже быша подобнии Тебе вси от века святии Твои.

ЕЙ, ГОСПОДИ ИИСУСЕ ХРИСТЕ, по неложному Твоему обетованию, прииди со Отцем и Духом Святым, и обитель Твою сотвори внутрь мене во веки веков.

Аминь.

Молитва в часы отчаяния

ГОСПОДИ БОЖЕ СПАСЕНИЯ МОЕГО, милостивым благоволением Твоим даровавый ми жизнь сию, неизреченною силою Твоею призвавый мя от небытия в бытие и в душу мою вложивый желание искати Тя, Создателя и Бога моего: услыши мя ныне в час сей, яко скорблю. Вложи в уста моя словеса благоугодная Тебе, исполни сердце мое смиренных чувств, и ум мой благих помышлений. Ты, Господи мой и Боже мой, благоволил еси открыти ми нетварный свет повелений Твоих яко путь ко спасению вечному, призри убо и ныне с небесе, и виждь печаль мою. Ты веси, Господи, тесноту сердца моего, и широка заповедь Твоя зело. Тонкая ткань сердца моего болезненно раздирается в подвизе сохранити словеса Твоя, и изнемогает душа моя во еже тещи вслед стопам Твоим. Темже молю Тя: скоро прииди и вселися в мя, и Сам Ты соверши во мне Волю Твою святую и всесовершенную, яко Ты рекл еси пречистыми усты Твоими, яко без Мене не можете творити ничесоже от повеленнаго Тобою. Ты даровал еси мне свет сей преходящий, благоволи убо излияти на мя, недостойнаго, Твой Свет невечерний; Ты ввел еси мя в жизнь сию, исполненную напастей и нетления, подаждь убо и мне, по безмерней милости Твоей, ту святую и непреложную жизнь, юже обещал еси всем возлюбльшим пришествие Твое.

Ей, ГОСПОДИ, не отвержи моления моего, но скоро услыши мя, яко отступил еси от мене, и покры мя тьма, удалился еси от мене, и сокрушися сердце мое, и несть мира в костех моих. Егда оставляеши мя, Господи мой и Спасе мой, жизнь сия бывает ми во ад. Сего ради паки взываю Ти: не закосни, яко душа моя от безмернаго страдания может возжелати смерти. Помилуй мя, и посети мя, одинока и безпомощна, и возведи душу мою от сени смертныя, потопившыя мя. Сотвори со мною, окаяннейшим всех, знамение Божественнаго благоволения Твоего, и даждь ми узрети радость спасения Твоего, прежде даже не оставлю мир сей.

Аминь.

Молитва

ГОСПОДИ ИИСУСЕ ХРИСТЕ, Сыне Бога Живаго, отверзи умныя очи омраченныя души моея, яко да и аз узрю Тебе, Бога моего и Творца, и тако сподоблюся истинно служити Тебе во вся дни живота моего. Припадаю Тебе, и молю Тя, не отвержи мене от Лица Твоего, но презрев все мое окаянство, и мерзость, и низость, яви ми Свет Твой, о Свете мира, и даждь ми познати любовь Твою к человеку, и да вообразится внутрь мене образ Твой непостижимый, по немуже создал еси человека, да вселится в мя доброта Твоя и сила Твоя.

Аминь.

Молитва в обстоянии

БОЖЕ ВЕЛИКИЙ И КРЕПКИЙ, Боже превечный и преблагий, обещавый услышати всех, во истине Тя призывающих, услыши в час сей и нашу недостойную молитву, и прииди во еже спасти ны от всех гонящих нас; запрети нечистым духам от лица безумия моего; и да отлучится от мене дух ненависти и злопомнения, дух зависти и лести, дух боязни и уныния, дух гордости и гнева, и да угаснет во мне всякое разжжение страстное, от действа диавольскаго находящее на мя. Очисти мя от всякия скверны плоти и духа, и да просветится душа моя, и тело, и дух светом Божественнаго Твоего познания, дабы и аз, по множеству благости Твоея, достиг в старости моей в мужа совершенна, в меру полноты, и тако прославлю со Ангелы и всеми святыми Твое пречестное и великолепое Имя, Отца и Сына и Святаго Духа, ныне и присно и во веки веков.

Аминь.

Молитва

ГОСПОДИ, ТЫ ВЕСИ, яко аз немощен есмь. Со страхом ищу аз путей к Тебе, не удалися от мене в падении моем; предстани ми, ничтожному, но жаждущему; вселися в мя, и Сам Ты совершай во мне вся, яже заповедал еси нам; сотвори мя Твоим на веки вечныя, в любви неколеблемей.

Аминь.

ЛИТУРГИЧЕСКИЕ МОЛИТВЫ

Молитва иерея, приступающего к служению Литургии

БОЖЕ МОЙ И ГОСПОДИ ИИСУСЕ ХРИСТЕ, се аз, недостойный иерей дерзаю паки приступити к страшному Престолу Твоему, да службу мою совершу. Молю Тя, Царю безначальне, Сый прежде всех век: не отврати Лица Твоего от отрока Твоего, и слуха Твоего от нечистых молитв да не заградиши. Ходатайства моего об искупленных Кровию Твоею да не презриши, и дерзновения моего да не вмениши мне во грех.

БОЖЕ МОЙ, в помощь мою вонми; Господи, помощи ми потщися...

Прошения перед Херувимской песнью

Первая пятерица

ОТЧЕ БЛАГИЙ, Сыне Единородный, Душе Святый, Троице светоначальная и животворящая, яже всякую тварь видимую и невидимую от не сущих во еже быти неизреченною премудростию Твоею приведшая и неисчетною силою Твоею содержащая, яже по прочих Твоих о роде нашем благодеяниих, пренебесное сие служение нам даровавшая, сподоби нас благодатию Твоею о величестве Тайны сея веровати и разумети, и сердцем чистым и умом просвещенным службы сея священнодействие якоже достоит совершати; молим Ти ся, услыши и помилуй.

БОЖЕ ОТЧЕ ВСЕДЕРЖИТЕЛЮ, основание Сый всему сущему, и вечности и времени, властию Твоею положивый пределы временнаго бытия нашего на земли, и в Сыне Твоем собезначальнем даровавый нам чрез воскресение жизнь вечную и Царство непреложное, приими нас, припадающих к Тебе, и укрепи нас Духом Твоим Святым в сей час предстояния нашего страшному Престолу Твоему к безкровному священнодействию и к неосужденному причащению Божественных Тайн; молим Ти ся, Отче благий, услыши ны и помилуй.

ЦАРЮ СВЯТЫЙ, ИИСУСЕ ХРИСТЕ, едине истинный Архиерею, принесый Себе на олтаре крестнем в мироискупительную жертву, и сим неисповедимым священнодействием давый нам Тело Твое пречистое в снедь и Кровь Твою честную в питие, сотвори ны достойны неизреченных сих Таинств, освящающих и обожающих нас; молим Ти ся, Христе, услыши ны и помилуй.

ДУШЕ СВЯТЫЙ, Боже великий и дивный, Света Источниче и Жизни Подателю, благий Утешителю и вседержавный Заступниче, Истины Откровение и тайносовершительная Сило, в сей страшный час непостижимыя Вечери Христа, не отврати Лица Твоего от нас, присно оскорбляющих Тя, но прииди, и милостивно склонися к немощи нашей, и вся совершив, введи ны в Чертог Его, неповинными и неосужденными; молим Ти ся, услыши и скоро помилуй.

БОЖЕ ОТЧЕ, Вседержителю Благий, сый благословен во веки, призвавый ны в вечную славу о Христе Иисусе, Иже един Праведник сый, за ны неправедныя пострада; Иже не сотворив ни единаго греха, грехи мира всего в Теле Своем на Крест вознесе, и излиянием Крове Своея тяготу клятвы законныя разруши; Иже в немощи плоти явил есть нам образ Твоего совершенства, молим Тя, Отче Святый, исполни ны свыше силою Твоею, да последуем стопам Его; сотвори ны подобницы быти Сыну Твоему возлюбленному в веце сем непостоянней и превратней, да не похулится нас ради истинный путь Твой, ниже поругаем будет от сынов противления.

Ей, Отче благий, во благоволении Твоем приими службу сию от рук наших и яви ны достойны причащения Тела и Крове Христа Твоего и вселения Духа Твоего.

Яко да под державою Твоею всегда храними, Тебе славу возсылаем, Отцу и Сыну и Святому Духу, ныне и присно и во веки веков.

Аминь.

Вторая пятерица

БОЖЕ ВЕЛИКИЙ, Троице Святая, единосущая и нераздельная, Царю и Творче всех веков, почтивый ны образом твоим, и в видимем зраце естества нашего подобие живописавый умнаго существа Твоего, сподоби нас обрести милость и благодать пред Тобою во еже славити Тя в невечернем дни Царствия Твоего со всеми от века святыми: отцы и праотцы, пророки и апостолы, мученики и исповедники, преподобными и святительми; молим Ти ся, услыши и помилуй.

ГОСПОДИ БОЖЕ ВСЕДЕРЖИТЕЛЮ, Отче Господа нашего Иисуса Христа, всесильне и многомилостиве, во дни оны изливый Духа Твоего Святаго на апостолы и всех, иже беху с ними, и даровавый им возвещати величия Твоя языками всея земли, и ныне, молим Тя, излий Того же Духа Твоего на ны, недостойныя рабы и рабыни Твоя, и сотвори ны, призывающих чудное Имя Твое, сыны и дщери нетварнаго Света Твоего, причащением Христовых Тайн; молим Ти ся, Отче благий, услыши и помилуй.

ГОСПОДИ ИИСУСЕ ХРИСТЕ, Слове Божий и Боже, един сый основание незыблемое Церкве Твоея, юже Крестом Твоим и смертию создал еси, воскресением совершил еси, вознесением благословил еси, Духа Святаго ниспосланием освятил и оживотворил еси во веки, сподоби ны неосужденнаго предстояния святей Твоей сей Трапезе и достойнаго причащения пречистаго Твоего Тела и честныя Твоея Крове; молим Ти ся, услыши и помилуй.

ДУШЕ СВЯТЫЙ, всесильне и самовластие, Отцу и Сыну единосущне и единославне, несозданнаго Света Источниче, премудрости и богоразумия Подателю, схождением Твоим всего мира концы к истинному боговедению приведый, сниди и ныне даже до нас, просвещаяй и освящаяй, исцеляяй и утешаяй нетленным Твоим утешением; молим Ти ся, скоро услыши ны и скоро помилуй.

ОТЧЕ БЛАГИЙ, Отче Святый и милостивый, открывый нам тайны безкровнаго священнодействия, и положивый нас грешных во еже приносити Тебе дары же и жертвы о гресех наших и о всем мире Твоем; Сам, невидимый Царю, призри благостынно на ны, в час сей предстоящия святому сему престолу, на немже предложитися имут страшныя Тайны Тела и Крове Единороднаго Сына Твоего и Бога нашего, и свободив ны от всякия скверны плоти и духа, просвети и освяти ны, да чистою совестию и просвещенным сердцем восприимем часть святынь, и соединимся Самому Христу Твоему, истинному Богу нашему, рекшему: ядый Мою плоть и пияй Мою Кровь, во Мне пребывает, и Аз в нем; да всельшуся в нас Слову Твоему, явимся храм Пресвятаго Твоего Духа, обновленнии в естестве нашем по дару сему.

Яко да под державою Твоею всегда храними, Тебе славу возсылаем, Отцу и Сыну и Святому Духу, ныне и присно и во веки веков.

Аминь.

Третья пятерица

ОТЧЕ БЛАГИЙ, Сыне Единородный, Душе Святый, великий и дивный Боже, рекий из тьмы возсияти свету, облистай во омраченных сердцах наших незаходимый свет боговедения Твоего, и в скудельных сосудех естества нашего яви непобедимую силу Твою, неприступны показав нас ни единой тьме, и к правде Твоей, юже открыл еси нам, да не приложится ни единое беззаконие, но да будет во всем непорочна и свята служба наша пред Тобою; молим Ти ся, услыши и помилуй.

ВЛАДЫКО БОЖЕ, Отче Вседержителю, от всея твари поклоняемый и воспеваемый, сподоби нас Тебе, Единаго воистину сущаго Бога и Отца нашего, благодарити и славословити за величество Любве Твоея, еюже нас, недостойных тако возлюбил еси, якоже Сына Твоего Единороднаго дал еси нам, да в Нем и чрез Него сынами Света Твоего явиши ны, Духом Твоим Святым удовли ны в час сей к достойному предстоянию у Престола Твоего и неосужденному совершению сея словесныя и безкровныя Жертвы; молим Ти ся, Отче благий, услыши и помилуй.

ГОСПОДИ ИИСУСЕ ХРИСТЕ, Сыне Единородне, от Отца прежде век нетленно возсиявый, Слово ипостасное, присносущныя славы Царю, в плоть оболкийся и принесый Себе в Жертву на олтаре крестнем нашего ради спасения, приими нас ныне, припадающих Ти, и сподоби ны причастия пречистых Твоих Тела и Крове во исцеление и освящение душ и телес наших; молим Ти ся, услыши ны и помилуй.

ДУШЕ СВЯТЫЙ, от Отца исходящий и в Сыне почивающий, прииди, Свете неописанне, вся исполняяй и животворяй, и просвети ны, омраченныя страстьми, исцели естество наше, падением Адамовым сокрушенное, и причащением пречистых Христовых Тайн запечатлей в нас Образ Его, смиреннаго и кроткаго Агнца Божия, вземлющаго грехи мира; молим Ти ся, услыши ны и скоро помилуй.

ГОСПОДИ ИИСУСЕ ХРИСТЕ, Сыне Бога Живаго, отверзый очи слепорожденному, отверзи умныя очи сердца нашего, и даждь нам узрети Тебе, Творца и Бога нашего. Молим Тя: не отвержи нас от Лица Твоего, и презрев все окаянство и низость нашу, яви нам Свет Твой, о Свете мира, и сынами Света Твоего покажи нас. О сладчайший Христе, от Отца низпославый Святаго Утешителя на святыя Твоя ученики и апостолы, даждь, Всеблагий, и нам недостойным дар Духа Твоего Святаго, Иже да научит ны познанию Твоему и да открыет нам тайны путей спасения Твоего.

Яко да под державою Твоею всегда храними, Тебе славу возсылаем со Отцем и Святым Твоим Духом, ныне и присно и во веки веков.

Аминь.

Четвертая пятерица

ПРЕБЕЗНАЧАЛЬНАЯ, Всесильнейшая Троице Святая, Отче, Сыне и Душе, Едине истинный Боже, поклоняемый и славимый на небеси и на земли, приемляй словесную службу от созданных Тобою, от всея твари видимыя и невидимыя: во благоволении Твоем приими и наше поклонение и славословие, и сподоби ны неизменне пребыти во свете Твоих неизреченных откровений; молим Ти ся, услыши и помилуй.

ВЛАДЫКО БОЖЕ, Отче Безначальне, низпосланием Духа Твоего Святаго законоположи нас в путех заповедей Твоих, и даже до последняго издыхания нашего сотвори ны неуклонны во истине исповедания Твоего. Исцели всякое неможение естества нашего и благоволением Твоим покрый грядущее время жития нашего, сподобляя нас достойно приносити безкровную Жертву о гресех наших и о всем мире Твоем; молим Ти ся, Отче Всесвятый, услыши ны и помилуй.

ГОСПОДИ ИИСУСЕ ХРИСТЕ, Боже Спасителю наш, един сый воистину Краеугольный Камень, на Немже зиждется всякая жизнь, призри милостивне на ны, недостойныя рабы Твоя, дерзающия в надежде на благоволение Твое принести Тебе сие священнодействие и Кровию Твоею омый нас от всякаго греха; молим Ти ся, Христе, услыши и помилуй.

ДУШЕ СВЯТЫЙ, Свете неименуемый, Свете неизследимый и сокровенный, прииди и вселися в ны: очисти ны от тьмы неведения, напой нас, жаждущия, таинственными струями познания Твоего, и изведи из темницы греховныя души наша, исцеляяй ны от всякия раны, таящияся в нас, причащением Божественныя и нетленныя Пищи — Тела и Крове Христа Бога; молим Ти ся, услыши и скоро помилуй.

ОТЧЕ СВЯТЫЙ, хвалим Тя, благословим Тя, кланяем Ти ся и благодарим Тя, яко избрал еси место сие и освятил еси храм сей к славословию пресвятаго Имене Твоего, и жертвенник к приношению безкровныя жертвы пресвятаго Тела и честныя Крове Христа Твоего. Молим Тя: николиже отступи от нас, но якоже в веках на жертвы отцев наших Духа Твоего Святаго ниспосылал еси в безмерной благости Твоей, сице и ныне, не презри молений и служб наших, но сотвори нас быти служители Новаго Завета, иже в Крови Христа Твоего, да причастницы сущи святых Твоих Таинств, явимся сынами Света Твоего в Сыне Твоем Единороднем.

Ей, Отче благий, отверзи умныя очи сердца нашего, и даждь нам воистину познати Тебе, Творца и Бога нашего: сотвори нас сообразны Слову и Сыну Твоему, да вообразится внутрь нас Его непостижимый образ, по нему же создал еси человека; сподоби нас быти селением Духа Твоего Святаго, и не ктому селением греха, вложи в сердца наша огнь Божественныя любве, прииди и вселися в ны вечным селением со Единородным Сыном Твоим и Духом Святым.

Яко да под державою Твоею всегда храними, Тебе славу возсылаем, Отцу и Сыну и Святому Духу, ныне и присно и во веки веков.

Аминь.

Пятая пятерица

СВЕТ СЫЙ ТРИИПОСТАСНЫЙ, Отче, Сыне и Душе, Творче наш, во свете живый неприступнем, естеством неосязаемый и неизреченный, призвавый нас в причастие наследия святых во Свете, открывый нам путь Святыни Твоея Евангелием Иисуса Христа, исправи служение наше, яко кадило пред Тобою, и милостивно приими жертву сию хваления и плод устен наших, исповедающих Тя; молим Ти ся, услыши и помилуй.

ОТЧЕ ВСЕСВЯТЫЙ, Сый от века и прежде всех веков, безпредельный и неизменный, предвечный Источниче всего сущаго, приими молитву нашу, даруй нам свободу от печали греховныя, вложи в сердца наша огнь любве Твоея, исполни ум наш светом Твоего богоразумия, дух наш возвыси к видению неизследимых судеб Твоих, да сподобимся служити Тебе в духе и истине даже до последняго издыхания нашего; молим Ти ся, услыши и помилуй.

ГОСПОДИ ИИСУСЕ ХРИСТЕ, Начальниче жизни, вся носяй глаголом силы Твоея, давый Себе измену смерти, и из прободеннаго ребра Твоего источивый человеком нетленную жизнь, не отврати Лица Твоего от нас, недостойных раб Твоих, но приими смиренную службу сию нашу, и милость Твою богатно излей на ны в веце сем, и в грядущем Царстве Твоем подавай нам истее причащатися Тебе, Пасха велия и священнейшая; молим Ти ся, Христе, услыши и помилуй.

ЦАРЮ НЕБЕСНЫЙ, ДУШЕ СВЯТЫЙ, благий Утешителю, едине даяй силу утружденным и крепость изнемогающим, без Негоже вси сильнии утомятся и крепции ослабеют, сытии взалчут и младии согнутся, смеющиися восплачут, и веселящийся возскорбят; услыши ны в скорби нашей и обнови ны в силе Твоей, и возведи ны к достойному служению Тебе; молим Ти ся, услыши ны и скоро помилуй.

ВЛАДЫКО ВСЕДЕРЖИТЕЛЮ, Иисусе Христе, безначальнаго Отца собезначальне Сыне и Слове, непостижимым истощанием Твоим все домостроительство спасения мира прекрасне совершивый, и в безмерности снисхождения вручивый немощным людем служение сему великому Таинству. Молим Тя, Владыко Христе, да почиет благоволение Твое на всем деле священныя службы нашея; очисти ны от всякаго греха и неправды; силою Духа Святаго преобрази все существо наше во мраке страстей лежащее, и возсоздай в нас искаженный падением Адама Твой образ предвечный, яко да и мы сподобимся непостыднаго предстояния Престолу Твоему, Иисусе Спасе мира.

Ей, Боже, Боже наш, милостивно приими от рук наших сию страшную Жертву о гресех наших, да причастницы сущи Божественных Твоих Тела и Крове, обрящем мзду верных Твоих служителей.

Яко да под державою Твоею всегда храними, Тебе славу возсылаем со Отцем и Святым Твоим Духом, ныне и присно и во веки веков.

Аминь.

Шестая пятерица

ОТЧЕ, СЫНЕ И ДУШЕ, в триех Лицех нераздельная Единице, Троическое едино Божество, Существо неприкосновенное, Свете неприступный, Тайно сокровеннейшая, от всея твари покланяемая, спаси ны верою и любовию воспевающия Тя; молим Ти ся, услыши ны и помилуй.

ОТЧЕ БЛАГИЙ, почтивый ны образом Твоим и даровавый нам радость познати истину Твою чрез воплощение Единороднаго Сына Твоего и сошествие Святаго Духа, от Тебе исходящаго; не отврати Лица Твоего от нас, недостойных раб Твоих и ниспосли на всех сынов человеческих дух истиннаго благочестия, да якоже воды наполняют море, тако да исполнится вся земля нетленным светом Твоего богоразумия; молим Ти ся, Отче Святый, услыши ны и помилуй.

ГОСПОДИ ИИСУСЕ ХРИСТЕ, Агнче Божий, Победителю Святый, приявый крестную смерть нашего ради спасения, избавивый нас от работы вражия, да нектому себе живем, но Тебе Единому, за ны умершему и преславно воскресшему. Сподоби нас достойно восприяти святых Твоих Тайн, да все, еже есть мертвенное в плоти нашей, пожерто будет нетленным Твоим животом; молим Ти ся, Христе, услыши ны и помилуй.

ДУШЕ СВЯТЫЙ, вечности Царю и жизни нетленныя Подателю, по множеству скорбей и воздыханий наших, умножи милость Твою в нас и низложи вся борющия ны враги, и буди Сам Ты действуяй в нас вся благоугодная Тебе, и освяти всех нас души и телеса освящением неотъемлемым; молим Ти ся, услыши и скоро помилуй.

ГОСПОДИ ИИСУСЕ ХРИСТЕ, непорочне Агнче Божий, закланный от сложения мира, Иже Кровию Своею искупил еси нас от всякаго колена и языка, сотворивый нас цари и иереи Богу и Отцу Твоему. Ты бо завесою пречистыя Плоти Твоея обновил еси нам путь новый и живый во Святая Святых во еже приносити сердцем сокрушенным и духом смирения словесную сию и безкровную службу нашу о гресех наших и о всем мире Твоем.

Темже припадаем и в умилении вопием Ти, долготерпеливе Господи: Духом страха Твоего осени нас, в час сей дерзающия приступити к подножию сея великия Тайны спасения мира, и сподоби нас сердцем, измовенным слезами, и умом, просвещенным евангельским Твоим словом, прикоснутися, елико по нашей силе, к таинству Твоего Божественнаго истощания.

О Свете мира, Егоже трепещут Серафими, лица закрывающе пред неприступною славою Твоею, и нас на земли удовли всеблагоговейно воззрети на Тя, молящагося с воплем крепким и со слезами в Гефсимании и восходяща на Голгофу, да чада Божия расточенная собереши воедино распростертыма на Кресте рукама Твоима.

Ей, Агнче Божий, вземляй грехи мира, запечатлей в нас сей образ Твой непостижимый, и укрепи ны последовати Тебе, аможе аще пойдеши, да Плотию Твоею пречистою питаеми и честною Кровию Твоею напаяеми, явимся люди обновления и царское священие во еже неосужденно ходатайствовати за весь род Адамов от начала даже до скончания века.

Яко да под державою Твоею всегда храними, Тебе славу возсылаем со Отцем и Святым Твоим Духом, ныне и присно и во веки веков.

Аминь.

Седьмая пятерица

ОТЧЕ БЛАГИЙ, Сыне Единородный, Душе Святый, Троице Единосущная, не отврати Лица Твоего от нас, яко скорбим; приими словесную сию службу нашу, приносимую Тебе сердцем сокрушенным и духом смирения, и сподоби нас воздати Тебе чистую хвалу о благодеяниих Твоих, и в мире глубоцем сохрани нас даже до последняго нашего издыхания; молим Ти ся, услыши и помилуй.

СЫЙ ОТ ВЕКА и прежде всех веков безпредельный и неизменный Господи, обратися и умолен буди на рабы Твоя, ибо в трудех и болезнех оскудевают дни наши и близок час нашего к Тебе отшествия, приими нас, припадающих к Тебе и укрепи ны в сей час пред стояния нашего страшному Престолу Твоему к безкровному священнодействию и к неосужденному причастию Святынь Твоих; молим Ти ся, Отче благий, услыши и помилуй.

ГОСПОДИ ИИСУСЕ ХРИСТЕ, Единородный Сыне Отца безначальнаго и Слове, Имже вся быша, и без Него ничтоже бысть, еже бысть, пришествием Твоим во плоти возсоздавый падший в первороднем Адаме образ Твой, приими поклонение наше и мольбы, из глубины греховныя тьмы возносимыя к Тебе, и силою Твоею возведи ны на высоту истиннаго разумения заповедей Твоих, да светом евангельскаго слова Твоего просвещени, сподобимся неосужденно причаститися Божественных Твоих Тайн, Плоти и Крове Твоея; молим Ти ся, Господи Иисусе, услыши и помилуй.

ДУШЕ СВЯТЫЙ, Свете незаходиме, Свете неприступне, благий Утешителю, ходатайствуяй о нас ко Отцу воздыханьми неизглаголанными, в сей страшный час Тайныя Вечери Христа, осени нас пришествием Твоим, и силою Твоею удовли ны к совершению сего Божественнаго священнодействия, Царствия Христова причастники ны сотворяя; молим Ти ся, скоро услыши и помилуй.

ГОСПОДИ ИИСУСЕ ХРИСТЕ, Боже Спасителю наш, мир Твой подавый человеком и Пресвятаго Духа дар с небес ниспославый в наследие неотъемлемое верным, Егоже преестественным действом нетленный свет боговедения роду человеческому даровася, и мы прелести, якоже тьмы, избавихомся и Тебе богословити со Отцем и Святым Духом, во едином Божестве, и силе, и власти озарихомся. Ты убо, Христе, Сый Отчее сияние, Существа и Естества Его неизменное и недвижное начертание, Источниче премудрости и благости неизследимая Пучино, отверзи сердце наше и утверди ум наш во еже знати Тебе, единаго истиннаго Сына Божия, вземлющаго грехи мира. Приими и нас, обуреваемых в мире сем, якоже приял еси Петра в море утопающаго, и укрепи нас силою Твоею на борющаго нас диавола. Се бо со страхом предстоим Тебе, в бездну милости Твоея отчаяние душ наших повергающе. Глаголом Твоим и неизреченною силою премудрости Твоея управляяй всю тварь, исправи живот наш к заповедем Твоим; тихое обуреваемых пристанище, единый истинный Путю, скажи нам путь воньже пойдем, яко Тебе предахом души наша: Дух премудрости Твоея безумию нашему даруй; Духом страха Твоего осени вся дела наша, да на всякий день и час Духом Твоим наставляеми и укрепляеми, сподобимся во всем творити волю Твою святую и всесовершенную. Яви нас носители Новаго Завета Твоего, иже в Крови Твоей, Иисусе Спасе наш, причастники нас сотворив пречистых Твоих Таинств; по множеству милости Твоея, приими нас, да будем достойны приносити Тебе жертву духовную о гресех наших и сподоби нас без порока служити Тебе вся дни живота нашего, яко да и мы унаследуем часть верных Твоих служителей в день страшный воздаяния Твоего праведнаго.

Яко да под державою Твоею всегда хранимы, Тебе славу возсылаем со Отцем и Святым Твоим Духом, ныне и присно и во веки веков.

Аминь.

Восьмая пятерица

ОТЧЕ БЛАГИЙ, Сыне Единородный, Душе Святый, Троице Святая и всезиждительная, непостижимым повелением Твоим призвавшая нас от небытия в жизнь сию, и Тебе Единаго воистину Сущаго Бога познание нам даровавшая, сподоби нас в сей страшный час священнодействия принести Тебе разумное благодарение и непорочное славословие; молим Ти ся, услыши и помилуй.

БОЖЕ ОТЧЕ ВСЕДЕРЖИТЕЛЮ, безначальне, неизменне, непостижиме, даровавый нам в Сыне Твоем Единороднем и возлюбленнем обручение будущаго наследия и славу сыноположения, низпосли на ны Духа Твоего Святаго, Иже да совершит ны во всяком деле блазе, наипаче же в сей страшный час священнодействия Божественных Твоих Тайн; молим Ти ся, услыши ны и помилуй.

ИИСУСЕ ХРИСТЕ, Боже, Спасителю наш, едине истинный Архиерею, Святый и непорочный, очисти ны от всякия злобы и лукавства, и даждь нам участие и наследие со всеми от века святыми в неизследимей Тайне любве Твоея, причастием Божественных Твоих Тела и Крове; молим Ти ся, услыши и помилуй.

ДУШЕ СВЯТЫЙ, Боже Живый и животворяй, вечности сый вечность, яко Сый прежде всех веков, от Него же исходит всякий свет бытия, милостивно призри на немощь естества нашего, помяни болезни наша и скорби, труды и злострадания, и силою Твоею Божественною удовли ны к достойному совершению сего небеснаго священнодействия; молим Ти ся, услыши и скоро помилуй.

ГОСПОДИ ИИСУСЕ ХРИСТЕ, Сый Отчее сияние, существа и естества Его неизменное и всесовершенное начертание, источниче премудрости и благости неизследимая пучино, отверзи сердце наше и утверди ум наш во еже знати Тебе, Единаго истиннаго Сына Божия, вземлющаго грехи мира.

Се бо со страхом и верою предстоим Тебе, в бездну милости Твоея отчаяние душ наших повергающе. Омый и очисти ны от всякаго греха и неправды, и силою Духа Твоего Святаго яви нас быти служители Новаго Завета Твоего, еже в Крови Твоей, Иисусе Боже наш; сотвори ны достойны приносити Тебе сию страшную Жертву о наших гресех и о всем мире Твоем; да причастницы сущи Божественных Твоих Тела и Крове, обрящем мзду верных Твоих служителей и мудрых строителей в день великий воздаяния Твоего праведнаго.

Яко да под державою Твоею всегда храними, Тебе славу возсылаем со Отцем и Святым Твоим Духом, ныне и присно и во веки веков.

Аминь.

Дополнительные варианты пятеричных прошений

Святой Троице

ОТЧЕ БЛАГИЙ, Сыне Единородный, Душе Святый, Троице Единосущная, Едина безначальная, от небытия в жизнь сию всяческая всезиждительным Твоим повелением приведшая и неисчетною силою Твоею содержащая и совершающая, человеки же нетленным светом Твоего богоразумия просветившая, и причастники безначальныя Твоея Жизни явившая, приими благоволением Твоим исповедание сие наше, и даруй нам обрести милость и благодать пред Тобою; молим Ти ся, услыши и помилуй.

Богу Отцу

ОТЧЕ СВЯТЫЙ, тако возлюбивый мир, яко же дати нам и Сына Твоего Единороднаго, Иже душу Свою положи о нас, да живи будем во веки, молим Тя, воззри милостивне на ны, яко наги изыдохом из чрева матере нашея, и ни единаго дела достойнаго Тебе сотворихом, пребывше даже до сего дне обнажени от всякия доброты; приими благоволением Твоим сию службу нашу, яви нас причастники Тела и Крове Христа Твоего и храмы Духа Святаго Твоего; молим Ти ся, услыши и помилуй.

Иисусу Христу

ГОСПОДИ ИИСУСЕ ХРИСТЕ, собезначальне Отцу Сыне и Слове, страхом Твоим утверди ны в путех истины Твоея, и силою любве Твоея возведи ны в след стопам Твоим, не попускаяй нам отступити от света повелений Твоих. Сподоби же нас неосужденнаго предстояния святей Твоей сей Трапезе и достойнаго причащения пречистаго Тела Твоего и честныя Крове Твоея; молим Ти ся, Христе, услыши ны и помилуй.

Иисусу Христу (иное)

ГОСПОДИ ИИСУСЕ ХРИСТЕ, осудивый грех Плотию Своею, призри на ны, во Адаме умирающия, и оживотворив нас причащением пречистых и безсмертных Твоих Тайн, приведи ны в совершенное познание Отца Твоего, и сотвори нас быти языком святым и царским священием в невечернем дни Царствия Твоего; молим Ти ся, услыши и помилуй.

Духу Святому

ДУШЕ СВЯТЫЙ, Великий Царю и Боже, прииди и вселися в ны, и силою пребывания Твоего в душах и умах наших, возведи ны на гору боговидения, свободив нас от тяжких уз греховных; молим Ти ся, услыши и помилуй.

Духу Святому (иное)

ДУШЕ СВЯТЫЙ, от Отца исходяй и в Сыне почиваяй, Свет сый неприступный и сила, животворящая всякую тварь, прииди, Всеблагий, и вселися в ны вечным вселением; исцели ны умерщвленныя грехом; настави ны, омраченныя, на всякую истину; вселением же Твоим в душах наших преобрази все существо наше во тьме падения лежащее, и искаженный в нас Адамов зрак возсоздай, да и мы явимся истинная чада Отца безначальнаго и сонаследницы Сына, прежде всех век возлюбленнаго, причастницы сущи Его пречистаго Тела и честныя Крове; молим Ти ся, услыши ны и скоро помилуй.

Заключительное прошение

ВЛАДЫКО ВСЕДЕРЖИТЕЛЮ, Иисусе Христе, пребезначальнаго Отца собезначальне Сыне и Слове, неизреченнаго ради милосердия Твоего все домостроительство спасения нашего прекрасно совершивый, и по безмерному благоволению Твоему вручивый немощным людем служение сему великому таинству спасения мира, Сам, Господи, щедрый и милостивый, пощади и помилуй нас, прости нам вся прегрешения наша, вольная и невольная; заступи ны силою Твоею от всякаго неприязненнаго нападения; сотвори ны неприступны всем кознем вражиим и неприкосновенны всякия скверны, от него находящия; сохрани ны неизменно в путех воли Твоея; утверди ны в истине слова Твоего, свобождая нас от всякаго неможения и неведения.

Ей, Господи, благий и кроткий, по дару Духа Святаго Твоего, благоволи нам быти непостыдными слугами святых Твоих Таинств; сподоби нас без порока прейти путь сей служения даже до последняго издыхания нашего, и даждь нам благоугодное Тебе слово во отверзении уст наших, во еже призывати благословение Твое на приносимыя нами дары.

Яко да под державою Твоею всегда храними, Тебе славу возсылаем со Отцем и Святым Твоим Духом, ныне и присно и во веки веков.

Аминь.

Заключительное прошение (иное)

БОЖЕ ОТЧЕ ВСЕДЕРЖИТЕЛЮ, от Негоже исходит всякий свет бытия, Боже живый и животворяй, не остави нас, заблуждших, яко овцы, от путей Твоих. Оскорбихом любовь Твою, согрешихом, беззаконовахом пред Тобою, ниже соблюдохом, ниже сотворихом, якоже заповедал еси нам. Се ныне предстоим Тебе, осужденнии, и отчаянно взываем Ти: силою Духа Твоего Святаго обнови естество наше, просвети и освяти нас до конца вселением в нас Слова Твоего; яви ны неизменно подобны Сыну Твоему возлюбленному, да сообразуются сердца наша непостижимому Его образу, по нему же создал еси Человека.

Яко да под державою Твоею всегда храними, Тебе славу возсылаем, Отцу и Сыну и Святому Духу, ныне и присно и во веки веков.

Аминь.

Молитва Великого входа^[8]

СЫЙ ВЛАДЫКО БОЖЕ, Отче Вседержителю, создавый нас и введый в жизнь сию, показавый нам пути во спасение, даровавый нам небесных тайн откровение: Ты бо еси положивый нас в службу сию силою Духа Твоего Святаго. Благоволи убо, Господи, быти нам служителем Новаго Твоего Завета, слугам святых Твоих Таинств. Приими нас, приближающихся святому Твоему жертвеннику, по множеству милости Твоея: да будем достойны приносити Тебе словесную сию и безкровную Жертву, о гресех наших и о гресех всего мира.

Аминь.

Молитва перед освящением Святых Даров^[9]

ОТЧЕ СВЯТЫЙ, приими нас, припадающих к подножию ног Твоих, и Имене ради Единороднаго Твоего возлюбленнаго Сына, Единаго Господа и Бога нашего Иисуса Христа, прости нам вся грехи и преступления наша за всю нашу окаянную жизнь, ради Крове Его, излиянныя на землю, юже мы осквернихом; ради Плоти Его пречистыя, жезлом пригвожденныя ко Кресту; ради всех страданий и терзаний души Его в мире сем; ради заповеди Его, данныя миру и достигшия даже до нас, чрез отцев наших, иже в истекших веках благоугодивших пред Тобою.

Ей, ОТЧЕ СВЯТЫЙ, Отче Благий, не презри ны, малое стадо Твое, не отвержи нас от Лица Твоего за невежество и окаянство наше; но якоже в веках низпосылал еси Духа Твоего Святаго на жертвы отцев наших, сице и ныне, не презри нашего приношения, и низпосли Духа Твоего Святаго на вся ны, зде сущия, и на предлежащия дары сия...

Заамвонная молитва

ВЕЛИЙ ЕСИ, ГОСПОДИ, и несть подобнаго Тебе. Милость и истина предъидита пред Лицем Твоим, правда и суд исходита от Престола Твоего. Блажени людие, хранящие завет Твой: во свете Лица Твоего пребудут и о Имени Твоем возрадуются и правдою Твоею укрепятся: Ты бо еси сила их, и во благоволении Твоем вознесутся, и во истине Твоей прославятся.

Господи, помощь Твою положи на нас, и стеною милости Твоея огради нас. Рука Твоя да заступит нас, и мышца Твоя да укрепит нас.

Господи, внегда призвати нам Тебе, приклони ухо Твое к нам: Ты бо еси Отец наш, не отрини убо нас в скорби нашей. Ты един еси Заступник спасения нашего, не презри нас и не предаждь нас в поношение врагом нашим.

Господи, Боже наш, благоволивый малому стаду Твоему завещати Царство неколеблемое и сокровище неоскудеваемое на небесех, услыши моление наше и прииди во еже заступити ны от всех гонящих нас. Един еси, сведый тайная сердца всякаго, не скрый от нас воли Твоея и пути спасения Твоего.

Неизследима судеб Твоих бездна, и совети Твои непостижимы; всем человеком хотяй спастися и в разум истины Твоея приити, изведи ны из рова падения нашего, и всякое недоумение от сердец наших отыми.

Ты бо еси Бог спасения нашего, инаго бо разве Тебе не вемы, и Имя Твое именуем, и славу Твою воспоем со всеми святыми во веки веков.

Аминь.

Заамвонная молитва иная

ВОЗСИЯЙ НАМ, Боже, Боже наш, Свет Твой истинный, да во Свете Твоем узрим славу твою, яко Единороднаго от Отца, и да вообразится внутрь нас образ Твой непостижимый, по нему же создал еси человека.

Боже, Спасителю наш, Сило ума и Крепосте души нашея, да вселится в нас доброта Твоя, да пребудем неотступно в Тебе, присно носяще в себе Духа Твоего Святаго, Иже да даст нам познати любовь Твою к человеку, и уподобитися Тебе, Единому Господу и Богу нашему, якоже быша подобнии Тебе вся от века святии Твои.

Ей, Господи Иисусе Христе, по неложному Твоему обетованию, прииди со Отцем и Духом Святым, и обитель Твою в нас сотвори во веки веков.

Аминь.

ДУХОВНИЧЕСКИЕ МОЛИТВЫ

Разрешительная молитва

ОТЧЕ НАШ НЕБЕСНЫЙ, Боже Вседержителю, хотяй всем человеком спастися и в разум истины Твоея приити, Тебе просим и Тебе молим, Господи: подаждь спасение рабом Твоим сим, и всю болезнь их утоли. Избави я от всякаго рабства греховнаго. Прости им прегрешения их, вольная и невольная, исповеданная или студом или забвением утаенная. Яко Ты един еси имеяй власть разрешити связанныя и исправити низверженныя. На Тя бо, Господи, все упование и чаяние наше возлагаем, яко Ты еси щедр и многомилостив. Даруй убо рабом Твоим сим прощение грехов и жизнь вечную причащением честнаго Тела и Крове Христа Твоего.

Аминь.

Молитва игумена или духовника^[10]

ГОСПОДИ ИИСУСЕ ХРИСТЕ, Боже Спасителю наш, исторгнувый мя от суеты мира, положивый мя в служение пренебесным Твоим Тайнам и призвавый мя на подвиг возвещати братии моей пути спасения Твоего; молю Тя, Царю безначальный: исцели мя от греховныя смерти, поразившия мя, и силою Духа Твоего Святаго удовли мя на службу сию.

СВЕТОДАВЧЕ, просвети очи сердца и ума моего нетварным светом заповедей Твоих да разумею, како ми подобает глаголати брату моему, за негоже излиял еси Кровь Твою на Голгофе. Духом Твоим благим руководи моими чувствами и мыслями, и страхом Твоим сохрани мя неуклонна в извечнем потоке воли Твоея. Сердце мое очисти от всякия скверны, да сподоблюся услышати Твой кроткий глас и послушным быти ему во смирении и во отверзении уст моих, удовли мя восприяти от Тебе слово Тебе благоугодное и людем Твоим спасительное. Живый истинный Путю сый, николиже попусти ми погрешати против истины Твоея, и от всякаго движения неподобнаго и слова ложнаго сохрани мя, да будет во всем служение мое свято и непорочно пред Тобою.

Ей, ПАСТЫРЮ ДОБРЫЙ, душу Твою положивый о нас, даруй и мне сердце милующее и плач благий о всех приходящих ко мне; даждь ми радоватися с радующимися, скорбети со скорбящими, и всячески утешати страждущия души людей Твоих. Укрепи мя до конца нести тяготы Твоих словесных овец с терпением и кротостию, в духе разсуждения, снисходительности и евангельския любве, яко да живет во мне токмо сия мысль: да вси чрез покаяние спасутся Тобою и в Тебе, непостижимем Господе нашем, ныне и присно и во веки веков.

Аминь.

Молитва иная игумена или духовника

ПОСЕТИ, ГОСПОДИ, вся братия и сестры наша, в болезнех и скорбех сущих, и исцели их силою Твоею.

Помяни, Господи, иже в темницах и узах сущих по всему лицу земли; промысли о иже гладом и жаждою томимых; иже в работах тяжких; иже в гонении за Имя Твое святое; иже в изгнаниях от насильства неправеднаго. Ей, Господи, помяни всех и вся, милости Твоея ищущих, и даруй всему миру насладиться покоем в Тебе.

Молю Тя, Господи, не попусти мне легкомысленно отнестись к печалям и нуждам обращающихся ко мне, недостойному; и когда я, омраченный, молю Тебя дать мне Твое спасительное для них слово, не лиши их благодати сей за мое окаянство и грехи. Яко да и в моем до конца недостойней служении прославляется Имя Твое святое и преблагословенное.

Аминь.

Молитва священнослужителя, игумена или духовника

ИИСУСЕ ВОЗЛЮБЛЕННЕ, Господи мой и Боже, исторгнувый мя от суеты мира, и от разновиднаго рабства свободивый; Ты бо еси исцеливый мя, прокаженного, низложенного же и нищаго обогативый; Ты щедро открыл еси мне путь к познанию Твоего Божества, Ты еси даровал мне, худшему всей твари, созерцати Твой нетварный Свет; положивый мя в служение пренебесным Твоим Тайнам, и введый мя на подвиг возвещати братии моей тайны спасения Твоего.

Тем же молю Тя, не остави мене в изнеможении моем, ниже осуди мя сурово, недостигающа чистоты слова Твоего. И аще воистину послал еси мя на служение сие, николиже отступи от мене, ведый немощь мою.

Ей, Господи, Господи мой, поставив мя у Престола Славы Твоея, Ты даруеши мне убогому дерзновение призывати страшное Имя Твое, и терпиши мя пред Лицем Твоим приносити безкровную Жертву Твою; Телом Твоим питаяй мя, и Кровию Твоею напаяяй мя, исполни убо всего мене истинным Твоим боговедением, якоже быти служению моему во всем святым и непорочным пред Тобою.

Услыши мя, Господи, не отврати Лица Твоего от мене, ниже возгнушайся мене в падениях моих, яко в безумии моем вся мыслих творити по благоволению святыя воли Твоея, по заповеди Твоей о любви к ближнему.

Милостивне убо приими молитву мою о просящих моего смиреннаго ходатайства о них: Едине Блаже, Подателю всякаго блага, в покаянии и плаче взыскующих Тя благодатию Твоею посети; в трудех житейских изнемогающих силою Твоею укрепи и даждь им свет надежды на непрестающую радость Царствия Твоего; нетрудным сотвори им путь Твой, егоже Сам Ты, Господи, тесным и скорбным наименовал еси; в пустыне безводней и непроходней века сего водою живою Слова Твоего напои их; отыми от сердец их мирския печали смерть, и оживотвори их причастием жизни, яже точию у Тебе и в Тебе Христе.

Ей, Господи, услыши всех нас, рабов Твоих, и имиже веси судьбами спаси. Да и мы прославим Имя Твое святое со Отцем и Святым Духом во веки веков.

Аминь.

МОЛИТВЫ СВЯТЫМ

Молитва празднуемому Святому

О СВЯТЫЙ и богоносне отче наш (имя), от младенства возлюбивый Христа паче всякаго инаго блага и всякия иныя красоты, и с великим плачем взыскавый Сего в житии Твоем, воистину обрел еси нетленный венец жизни вечныя, и ныне, веселяся с небесными силами, ненасытимо насыщаешися неизреченныя Его доброты. Молим Тя, Преблаженне, призри с небес на ны, недостойныя, с любовию творящия память святую Твою, и прииди, и стани посреде нас, и буди сам Ты начальником нашего сего торжества.

Ей, СВЯТЫЙ ОТЧЕ, еще в житии сем насладивыйся Духом Святым, Иже вселением Своим даде Ти в любви к человеку уподобитися Христу Богу, молим Тя, помяни нас, чад Твоих, в тесноте и скорби сущих; болезновав на земли в молитвах о мире, ныне же безболезненно предстоя Престолу Господа Славы, испроси мирови мир, Церкви Православней утверждение, священником заступление, малодушным терпение, болящим исцеление, омраченным просвещение, отчаянным непостыдную надежду, скорбящим утешение, умирающим благое извещение.

Помяни нас, ОТЧЕ БЛАЖЕННЕЙШИЙ, зле бедствующих в мире сем и потопляемых бурею страстей, и умири жизнь нашу; отыми от нас всякую вражду и неприязнь; научи нас любви и милосердию, защити ны от всякаго навета вражия, яко да без порока прейдем путь жития сего и тако достигнем ходатайством Твоим в Царство святых и воспоем в радости спасения нашего всесвятое и превожделенное Имя Отца и Сына и Святаго Духа, во веки веков.

Аминь.

Молитвы старцу Силуану

Молитва первая

ПРЕПОДОБНЕ И БОГОНОСНЕ отче наш Силуане, Господь дал Тебе в жизни сей насладиться Духом Святым, и душа Твоя возлюбила Его. Ты воистину всею силою души Твоея возлюбил непостижимо явившегося Тебе Христа паче всякаго иного блага, мудрости или красоты, и с великим плачем взыскал Его в житии своем; ныне же ненасытимо насыщаешься неизреченныя Его доброты, и радуешься с небесными умами в неболезненном предстоянии Престолу возлюбленнаго Тобою Господа.

Молю убо Тебя: помяни меня в тесноте и скорби моей, и помоги мне. Испроси у Господа изнемогающей душе моей силу любить Его всем существом моим. Твоими молитвами наставь меня, омраченнаго и недостойнаго, к познанию той любви, которой Ты был научен Духом Святым в явлении Тебе Господа Иисуса, да и аз удостоюся хотя бы отчасти разуметь слова Твои и силу молитвы Твоей, и предложить их народам земли. Ей, отче Силуане, не оставь меня, не отврати слуха Твоего от молитвы моей, и прииди в помощь мне, нищему.

Молитва вторая

ПРЕПОДОБНЕ И БОГОНОСНЕ отче наш Силуане, молю Тебя снова и снова, помяни меня, печальнаго и немощнаго в юдоли земной. Уныние сковало душу мою, и нет во мне святаго молитвы огня; ум мой порабощен бесплодными и суетными заботами, и от умных очей моих скрылось видение небеснаго Света; далече отпал я от веселия небесных сил, и душа моя изнывает от жажды воды, текущей в жизнь вечную; как оторвавшийся от скалы камень стремительно низвергается в пропасть, так отпавшая от любви Христовой душа моя ниспадает в бездну отчаяния, и тьма сгущается вокруг меня.

Молю Тебя, отче Силуане, научи меня любить Господа всеми силами моего существа; вразуми меня в труде над словом Твоим; настави меня во всяком слове, дабы не погрешил я по невежеству моему ни против Бога, ни против духа и мыслей Твоих; прииди сам Ты духом Твоим, и внуши мне в сердце моем и во уме моем угодное Тебе, да предложу людям святое слово Твое о мире Христовом, о благодати Святаго Духа, о любви Божией, о величии смирения и послушания, об очистительном огне покаяния, о плаче, омывающем скверны страстей, о чистой молитве, единящей нас с Богом и Отцом нашим. Ей, отче Силуане, не отступи от меня во все время труда моего над словом Твоим.

Молитва третья

БЛАЖЕННЕ ОТЧЕ СИЛУАНЕ, Ты насладился Духом Святым во дни жизни земной, и ныне радости Твоей никто не отымет от Тебя, по слову Господню. Воззри на меня; изранена душа моя, и нет во мне места живого. Злые мысли отняли от меня всякую радость и горькою скорбью напояют обнищавшее сердце мое. Любовь и мир отошли от меня, омрачился мой ум, разслабление и малодушие овладели мною, и умножились наветы сопротивных сил. Молю Тебя, отче, во вся дни жизни моей буди мне защитником и наставником; от силы Твоей излей некую долю на душу мою и дай мне завершить течение жизни моей в покаянии, да и аз молитвами Твоими узрю богатство обетований Божиих и причащусь наследию вечных благ в невечернем дни Царствия Христова.

Молитва четвертая

ОТЧЕ СИЛУАНЕ, ныне Ты неболезненно и в радости великой предстоиши Престолу Господню на небесех, я же в юдоли земной немощен и печален. Ты достиг незаходимаго Света, меня же объемлет тьма. Ты чистым умом созерцаешь славу Господню, мой же ум погряз в безплодных помышлениих. Уныние сковало душу мою, и нет сил подняться. Молю Тебя, помоги мне. Умири мою жизнь. Отыми от меня всякое разслабление и малодушие. Защити меня во вся дни жизни моей от всякаго навета сопротивных сил. Буди ми верным наставником на пути моем к Богу.

Аминь.

МОЛИТВЫ ИЗ ЖИЗНИ МОНАСТЫРЯ

Молитвы о единстве

Молитва первая

ГОСПОДИ ИИСУСЕ ХРИСТЕ, Агнче Божий, вземляй грех мира, восходом Твоим на Голгофскую Гору искупил еси ны от клятвы законныя и возставил еси Твой падший образ, на Кресте пречистеи руце Твои прострый, да чада Божия расточенная собереши во едино, и низпосланием Пресвятаго Духа в соединение вся призвавый, Ты убо, Сый Отчее сияние; перед исходом Своим на сие великое мироискупительное священнодействие, молился еси Отцу Твоему, да будем вси едино, якоже Ты един еси со Отцем и Духом Святым, даждь убо нам благодать и мудрость исполнити сию заповедь на всяк день, и укрепи нас на подвиг тоя любве, юже заповедал еси нам, рекий: да любите друг друга, якоже возлюбих вы. Духом Твоим Святым даждь нам силу смирятися друг перед другом, поминая, яко аще кто больше любит, той и больше смиряется; научи нас молитися друг за друга, нести тяготы друг друга в терпении, и объедини нас союзом любве неразрушимыя во едино стадо послушных овец окрест возлюбленнаго отца нашего игумена, даруя нам и зрети в коемждо брате и сестре нашей образ Твоея неизреченныя славы и не забыти, яко брат наш есть наша жизнь.

Ей, Господи, собравый нас от конец земли благоволением Твоим, сотвори нас быти воистину во едину семью, живущую единым сердцем, единей волей, единей любовию, яко един человек, по предвечному совету Твоему об Адаме первороднем. Утверди, защити и покрый место святое сие, еже насади Десница Твоя, и покрый е покровом Пречистыя Твоея Матере, честнаго Крестителя Твоего Иоанна, преподобнаго отца нашего Силуана, благословляяй и заступаяй коегождо зде живущих (имена), сохраняя же нас всех от тлетворных помыслов, от неподобающих слов или движений сердечных, могущих разрушити священное дело нашего служения, яко да созиждется обитель сия на камени евангельских Твоих заповедей местом исцеления, освящения и спасения, ради нас самих и ради всех притекающих семо, труждающихся и обремененных братьев и сестер наших, да обрящем вси покой в Тебе, кротком и смиренном Царе нашем, ныне и присно и во веки веков.

Аминь.

Молитва вторая (по причащении)

ГОСПОДИ БОЖЕ МОЙ, Иисусе Христе, удостоивший меня в час сей воспринять часть святынь Твоих честнаго Твоего Тела и Крове Твоея, услыши молитву мою и вонми гласу моления моего: Ты распростер руце Твои на Кресте, да собереши во едино всех нас, возлюбивших пришествие Твое во плоти; молюся убо Тебе: сотвори со мною чудо благоволения Твоего, и всего меня освяти любовию Твоею, и до последней глубины моей просвети мя Духом Твоим Святым, и исполни мя силою Твоею, дабы я возмог служить Тебе, служа приходящим во святое место сие всем лишенным и сокрушенным сердцем созданиям Твоим, совместно с данными мне Тобою братьями и сестрами в единстве любве и взаимного доверия.

Ей, Господи, Спасе наш, да не обрящется места никакому недоверию или сомнению между нами, могущему разрушить или повредить делу служения нашего обращающимся к нам о Имени Твоем святем.

Аминь.

Молитвы о братии

Прошение первое

ГОСПОДИ И БОЖЕ НАШ Иисусе Христе, неизреченным снисхождением воплотился еси, Слове Отчее, и с нами, долу лежащими, пожил еси; Крестом же в преисподняя к сидящим во тьме и сени смертней снизшел еси; таже содержимый под стражею адовою зрак Адамов Божественным Твоим воскресением совозставил еси, и преславным вознесением Твоим на небеса возвел еси, и одесную Отца на Престоле спосадил еси, Христе, Спасе наш. Темже молим Тя: в безмерней благости Твоей, призри ныне на скорбь и нищету нашу, на неможение наше, и еже от врага на всякий час попрание, и умножи милость Твою в нас; благословением благостынным осени исходы наша на всякое дело и слово благое, и входы наша на всякую молитву, Тебе приносимую нами; законоположи нас в путех заповедей Твоих, и в слове исповедания истины Твоея неколеблемы ны сотвори; яви нас быти слугами и причастниками непостижимых Твоих Таинств, и даже до последняго издыхания нашего достойно приносити Тебе жертвы духовныя сподоби.

Ей, Господи, не посрами нас, всю надежду на Тя единаго положивших, и инаго заступления, кроме Тебе, в мире сем не имущих. Буди нам покров и ограждение, покой и радование, мир и крепость, спасение и освящение.

Ты бо един еси Бог наш, разве Тебе инаго не знаем, и Тебе со Отцем и Духом славу вси возсылаем во веки веков.

Аминь.

Прошение второе

ГОСПОДИ БОЖЕ НАШ, Егоже держава несказанна, и слава непостижима, Егоже милость безмерна, и человеколюбие неизреченно: Сам, Владыко Всесвятый, прошения наша к полезному исполни, и сотвори с нами богатыя милости Твоя и щедроты Твоя, Врачу и Исцелителю душ наших; настави нас ко пристанищу хотения Твоего; просвети очи сердец наших в познание истины Твоея, огради нас от всякаго пути неправды и от различных козней лукаваго, и ненаветну жизнь нашу сохрани благодатию Всесвятаго Твоего Духа. Ангелу мирну заповеждь соблюдати входы наша и исходы на всякое дело благое, и даруй нам, Боже, Боже наш, веру непостыдну, надежду известну, любовь нелицемерну; благослови и исправи деяния наша, словеса и помышления; вложи в нас святый и животворящий Твой страх, и радость спасения Твоего скажи нам, и сподоби нас даже до последняго издыхания нашего приносити Тебе жертву правды и славословие со всеми созданиями Твоими.

Яко Тя хвалят вся силы небесныя, и Тебе славу возсылаем Отцу и Сыну и Святому Духу, ныне и присно и во веки веков.

Аминь.

Прошение третье

БОЖЕ, СОДЕТЕЛЮ НАШ, призри на ны, грешныя и непотребныя рабы Твоя, и внегда призывати нам святое и поклоняемое Имя Твое, не посрами нас от чаяния милости Твоея; даруй нам, Господи, вся потребная ко спасению, и сподоби нас любити и боятися Тебе от всего сердца нашего, и творити во всем волю Твою. Ты бо еси Бог наш, немолчными песньми и непрестанными славословеньми от святых сил воспеваемый, исполни и наша уста хваления Твоего, еже подати величествие Имени Твоему святому, и даждь нам участие и наследие со всеми боящимися Тебе истиною и хранящими заповеди Твоя, молитвами Всесвятыя Богородицы и Приснодевы Марии, предстательством честных небесных сил безплотных и всех от века святых Твоих.

Яко Тебе подобает всякая слава, честь и поклонение, Отцу и Сыну и Святому Духу, ныне и присно и во веки веков.

Аминь.

Прошение четвертое

БОЖЕ ВЕЛИКИЙ И ВЕЧНЫЙ, един истинный и праведный, един щедрый и милостивый: да приидет Дух Твой на нас, и сила Твоя да осенит нас; простри от святаго жилища Твоего невидимую руку Твою, и благослови всех нас, и даждь нам по благости Твоей неизменно пребыти в путех воли Твоея, и даже до последняго издыхания нашего неотступно покрый нас безмерным Твоим благоутробием.

Ты бо един еси Защититель наш и Покровитель, и Тебе славу возсылаем, Отцу и Сыну и Святому Духу, ныне и присно и во веки веков.

Аминь.

Прошения о храме и о монастыре

На сугубой ектении

ГОСПОДИ ИИСУСЕ ХРИСТЕ, пред мироискупительною Страстию Твоею моливыйся Отцу Твоему, да вси исповедающии Имя Твое едино будут, удовли вся ны к совершению заповеди Твоея сея, силою и наитием Всесвятаго Духа Твоего; молим Ти ся, услыши и помилуй.

ИИСУСЕ ХРИСТЕ, Боже Спасителю наш, раздаянием огненных языков в пятидесятный день вся языки призвавый в соединение, молим Тя, низпосли на ны дар Духа Твоего Святаго, да исполнятся сердца наша истинныя любве ко искреннему нашему и ко всякому разумному созданию Твоему; молим Ти ся, услыши и помилуй.

Еще молимся о милости, жизни, мире, здравии, спасении, и благопоспешении рабов Божиих (имена); благодатию и щедротами Твоими, Господи, исполни вся прошения их; прости им всякое согрешение вольное и невольное; благоприятны да будут мольбы и милостыни их пред Престолом владычествия Твоего; покрый их от враг видимых и невидимых, от всякия напасти, беды и скорби свободи, и даждь им мир, здравие и долгоденствие; молим Ти ся, милосердне Господи, услыши ны и скоро помилуй.

Призри, Владыко Человеколюбче Господи, милостивным Твоим оком на рабы Твоя сия (имена) и услыши недостойная моления наша, с верою приносимая Тебе. Сам бо рекл еси, Господи: вся елика молящеся просите, веруйте, яко приимите, и будет вам. Сего ради и мы, аще и недостойнии, уповающе на милость Твою просим: подаждь благость Твою, рабом Твоим сим и исполни благая желания их, в мире и тишине вся дни их соблюди; молим Ти ся, всещедре Господи, услыши ны и скоро помилуй.

БОЖЕ ОТЧЕ ВСЕДЕРЖИТЕЛЮ, Тебе, создавшему нас зиждем мы храмы немощными руками нашими из мертвых камней, но Ты благоволением благости Твоея сотвори нас быти живыя храмы Духа Твоего Святаго; молим Ти ся, услыши ны и помилуй.

БОЖЕ, БОЖЕ НАШ, в нищете и изгнании суще, не имамы ниже места, ни силы, ни власти что-либо создати, Ты же, благий Создателю всяческих, неизреченным могуществом Твоим утверждаяй всю тварь, утверди и наших рук малое дело сие; молим Ти ся, услыши и помилуй.

ГОСПОДИ ИИСУСЕ ХРИСТЕ, приступльше ко Святому Твоему жертвеннику да принесем Тебе, Богу нашему, безкровную службу, Тобою нам преданную чрез святыя Твоя апостолы, и просим и молим Тя, всеблагий Господи, призри милостивно на службу нашу, и не отвержи приношения нашего, но услыши ны и помилуй.

ОТЧЕ БЛАГИЙ И СВЯТЫЙ, щедрый и милостивый, призри человеколюбно на молитву нашу, и прииди во еже спасти нас, и егда призывати нам страшное Имя Твое, милостивно сниди до нас, и присно пребуди с нами, якоже пребывал еси со святыми Твоими апостолы; молим Ти ся, услыши и помилуй.

ГОСПОДИ БОЖЕ НАШ, во дни оны премудрый Соломон взываше к Тебе, моляся: да будут очи Твои день и нощь отверсты на воздвигнутый им храм, призывание же Имене Твоего святаго на услышание молитвы, еюже молятся раби Твои; и ныне, Владыко Святый, призри милостивно на сей малый и убогий храм, и сотвори его быти местом пребывания Имене Твоего, и домом молитвы ради всех народов, благоугодныя пред Тобою; молим Ти ся, услыши и помилуй.

ОТЧЕ БЛАГИЙ, Владыко многомилостиве, благоволением Твоим призри на скорби наша, и посетив нищету нашу, спаси нас, да будем наследницы во славе святых Твоих, от века Тебе благоугодивших; молим Ти ся, услыши ны и помилуй.

СЫЙ, ВЛАДЫКО Боже Вседержителю, сниди к нам, милосердия ради милости Твоея, и неотступно пребуди с нами, низпосылая благодать Святаго Духа на приношения наша, яко низпосылал еси в века на жертвы отцев наших, благоугодивших пред Тобою; молим Ти ся, услыши и помилуй.

ОТЧЕ СВЯТЫЙ, не отврати Лица Твоего от нас, яко скорбим; приими словесную сию службу нашу, приносимую Тебе сердцем сокрушенным и духом смирения, и сподоби нас воздати Тебе чистую хвалу о благодеяниих Твоих, и в мире глубоцем сохрани нас даже до последняго издыхания; молим Ти ся, услыши и помилуй.

БОЖЕ СВЯТЫЙ, Творче и Содетелю всяческих, немощными рукама мы зиждем Тебе храмы из мертвых камней, в приношение молитв и безкровныя жертвы, Ты же, везде Сый и вся исполняяй, Едине приводяй вся в совершение, сотвори нас быти живое селение Твое, во веки неизменное; молим Ти ся, услыши и помилуй.

ГОСПОДИ БОЖЕ НАШ, пришельцы суще на земли чуждей, не имамы ни места, ниже власти к созиданию храма, достойнаго велелепия Имене Твоего, но Ты, Всеблагий, вся носяй глаголом силы Твоея, утверди и наших рук малое дело сие, и службу нашу милостивно приими; молим Ти ся, услыши и помилуй.

ГОСПОДИ ИИСУСЕ ХРИСТЕ, един сый воистину краеугольный Камень, на Немже зиждется всякая жизнь, призри милостивно на ны, недостойныя рабы Твоя, дерзнувшия в надежде на Тя воздвигнути храм сей, во еже приносити в нем мольбы и моления наша Тебе, Творцу и Спасу нашему, и основай его на твердом камени истиннаго исповедания Твоего, о Ты, основавый землю на тверди ея; молим Ти ся, услыши и помилуй.

ГОСПОДИ ИИУСЕ ХРИСТЕ, Спасе наш, призыванием страшнаго и всесвятаго Имене Твоего, благоволи оградитися месту сему от всякаго действа вражия, и да отступят от него вся противныя силы, и ничтоже вредное да не коснется рабов Твоих, мольбы и прошения своя приносящих Тебе в святем храме сем; молим Ти ся, услыши и помилуй.

ГОСПОДИ ИИСУСЕ ХРИСТЕ, вознеслся еси превыше всех небес и одесную Отца возсел еси в неизреченней славе, прекрасне исполнив еже о нас Отеческое смотрение. Восприяв бо древле падшее Адамово естество и Собою обожив е в славнем вознесении Твоем, спосадил еси на Престоле Предвечнаго Божества. Сего ради излей и на ны, недостойныя, обетованнаго Духа Святаго, и не лиши нас радости прежде сложения мира избранных Твоих; молим Ти ся, всеблагий Христе, услыши нас и помилуй.

ГОСПОДИ ИИСУСЕ ХРИСТЕ, Сыне Божий, един сый основание незыблемое Церкве Твоея, юже Крестом Твоим и смертию стяжал еси, воскресением совершил еси, вознесением благословил еси, Духа же Святаго сошествием освятил и оживотворил еси во веки, Тебе ныне смиренно просим: благослови и ущедри вся ны, недостойныя рабы и рабыни Твоя, и вся потребная к совершению и сохранению храма сего и святыя обители сея, Божественным Твоим Промыслом изобильно подай; молим Ти ся, услыши и скоро помилуй.

ГОСПОДИ, БОЖЕ НАШ, утверждаяй всю тварь могуществом Твоим, утверди немощных рук наших дело, и малому храму сему сотвори быти местом явления славы Твоея, и домом молитвы, ради всех народов, благоугодныя пред Тобою; молим Ти ся, услыши и помилуй.

БОЖЕ И ГОСПОДИ СИЛ, да будут очи Твои день и нощь отверсты на храм сей, и призывание Имене Твоего святаго на услышание молитвы, юже приносят Ти раби и рабыни Твоя; молим Ти ся, услыши ны и помилуй.

ГОСПОДИ ИИСУСЕ ХРИСТЕ, Спасе наш, на камени исповедания Божества Твоего изволивый создати Церковь Твою незыблему и от врат адовых необориму, милостивно призри ныне на немощь нашу, и на камени заповедей Твоих утверди сердца наша, да к Тебе всегда взирающе и Божественным словом Твоим напояеми, и сами мы яко камение живо созиждемся в дом духовен, и храм Духа Твоего Святаго явимся, во еже приносити Тебе, Единому Богу нашему, непорочныя жертвы, благоприятныя пред Тобою; молим Ти ся, услыши и помилуй.

ГОСПОДИ ИИСУСЕ ХРИСТЕ, силою Духа Твоего Святаго возведи ны в след стопам Твоим, и сотвори ны достойны приносити Тебе жертву духовную о гресех наших и о всем мире Твоем, да причастницы суще Божественных Твоих Тайн, обрящем милость Твою в день великий воздаяния Твоего праведнаго; молим Ти ся, услыши и помилуй.

МОЛИТВЫ О ЗДРАВИИ

Молитвы о сущих в обстоянии

О скорбящих

ПОМОЩНИЧЕ, ИЗБАВИТЕЛЮ И СПАСЕ скорбьми сокрушенных, Владыко Христе, милостию Твоею скоро посети в напасти и скорби сущия рабы Твоя (имена), богатством щедрот Твоих изимаяй я от всякаго озлобления, да в радости спасения Твоего прославят Божественную силу Твою; молим Ти ся, всеблагий наш Спасе и Утешителю, услыши ны и скоро помилуй.

ГОСПОДИ БОЖЕ НАШ, помощь сый безпомощным, надежда отчаянным, заступление всем онеправданным и гонимым Имене Твоего ради, помяни и милостивно посети люди Твоя: иже в девстве и благоговении, в постничестве и в чистем жительстве пребывающих; иже во обителех, в пустынех и горах подвизающихся; иже в сиротстве или вдовстве, иже в заточениих или изгнании, и всякой иной скорби и обстоянии сущих. Сам, Господи, ведый коегождо нужду и прошение, спаси и ущедри; молим Ти ся, услыши ны и помилуй.

О плачущих

ГОСПОДИ СИЛ, скорбящих радосте и плачущих истинное утешение, и всех в малодушии сущих укрепление сый: милостию Твоею посети рабы Твоя (имена) и всякую болезнь в сердцах их исцели; молим Ти ся, услыши и помилуй.

О болящих

ГОСПОДИ БОЖЕ НАШ, едине душ и телес наших истинный Врачу, с сердцем сокрушенным к Тебе припадаем и стеняще вопием Ти: исцели болезни, уврачуй страсти душ и телес рабов Твоих, братий и сестер наших в недузех и скорбех сущих и на одре болезни лежащих (имена) и всех заповедавших нам, недостойным, молитися о них.

Прости им, яко Благосерд, вся прегрешения их вольная и невольная, запрети болезни, отстави всякую страсть и всяк недуг, простри крепкую руку Твою, и якоже тещу Петрову от одра болезни воздвигни и здравых представи Церкви Твоей Святей и ближним их; молим Ти ся, всещедре Господи, услыши ны и скоро помилуй.

ВЛАДЫКО ВСЕДЕРЖИТЕЛЮ, Царю Святый, телесныя скорби исправляяй человеком, молимся Тебе: врачебную силу Твою с небесе низспосли на страждущия рабы Твоя (имена), и возстави их от ложа озлобления целы и всесовершенны, и даруй их Церкви Твоей Святей благоугождающа и творяща волю Твою; молим Ти ся, услыши ны и скоро помилуй.

ЧЕЛОВЕКОЛЮБЧЕ ГОСПОДИ, благоутробне и многомилостиве, едине истинный Врачу, исцели рабы Твоя (имена) и милостию Твоею посети их, яко да возставше силою Твоею от одра немощи своея со всяким благодарением поработают Тебе прочее время живота своего; молим Ти ся, услыши ны и помилуй.

ПРИЗРИ С НЕБЕСЕ, благоутробне Господи, на страждущия рабы Твоя, братия и сестры наша, в недузех и скорбех сущия (имена), и невидимою рукою Твоею от одра болезни воздвигни, свобождая их от всякаго недуга и язвы, таящияся в них; очисти их от всякия скверны душевныя и телесныя, и сохрани прочее время живота их в мире и целы, ходящия во оправданиих Твоих, яко да и в сих прославится всесвятое Имя Твое; молим Ти ся, всещедре Господи, услыши и помилуй.

ВРАЧУ И ПОМОЩНИЧЕ в болезнех сущих, Избавителю же и Спасе скорбьми сокрушенных, Владыко Христе, милостию Твоею скоро посети страждущия рабы Твоя (имена), изымая их от всякаго озлобления богатством щедрот Твоих; молим Ти ся, услыши и помилуй.

Молитвы за священников и духовников

Молитва первая

ГОСПОДИ ИИСУСЕ ХРИСТЕ, Боже Спасителю наш, помилуй и спаси раба Твоего (имя), и молитвами служителя Твоего прости ми, немощному и недостойному, вся грехи моя; излей на мя милость Твою, якоже излил еси, Господи, на жену хананейску; пощади мене и ущедри, низпосли ми благословение Твое, и буди ми Хранитель Святый и Помощник державный; соблюди мя от всякаго дела и слова душетленнаго, Тебе, Богу моему неугоднаго и брату моему неполезнаго; покрый мя от всех козней и наветов вражиих; исправи стопы моя пред Тобою; утверди мя в любви Твоей; и даждь ми, немощному паче всякаго человека, неосужденно причащатися святых Твоих и безсмертных Тайн, просвети мя, до конца омраченна, светом заповедей Твоих; облагоухай мя, недостойна, благоуханием безстрастия Твоего, и Духом Твоим Святым возведи живот мой от тли и сени смертныя к нестареемей жизни во Царствии Твоем, Господи.

Ей, Господи, молитвами отца моего, служителя Твоего, услыши мя в скорби моей, и вонми молению моему в печали моей. В безмерной благости Твоей низпославый Духа Святаго Утешителя на святыя Твоя ученики и апостолы, даждь и мне, окаяннейшему всякаго создания, дар Духа Твоего Святаго, да укрепит мя и наставит на всяку истину и на всякое дело благое послушания.

Аминь.

Молитва вторая

ГОСПОДИ ИИСУСЕ ХРИСТЕ, Боже Спасителю наш, помилуй и спаси раба Твоего (имя), и за его молитвы прости мне грехи моя и излей на мя благословение Твое. Буди ми, недостойному и немощному, Хранитель Святый, Помощник державный; соблюди мя от всякаго дела и слова душетленнаго и неугоднаго Тебе; покрый мя от всех козней и наветов вражиих; исправи пред Тобою стопы моя; утверди мя на камени заповедей Твоих; просвети мя нетленным светом повелений Твоих, и Духом Твоим Святым возведи мя от тли и сени смертныя к нестареемей жизни во Царствии Твоем.

Боже, Боже мой, буди милостив мне, грешному, молитвами отца моего духовнаго.

Аминь.

Молитва третья

ВЛАДЫКО ВСЕДЕРЖИТЕЛЮ, Господи Иисусе Христе, пребезначальнаго Отца собезначальный Сыне и Слове, неизреченнаго ради милосердия Твоего все домостроительство спасения нашего прекрасне совершивый, и по безмерному благоволению Твоему вручивый немощным людем служение сему великому таинству спасения мира, Сам Ты, Господи, в благости Твоей ущедри и помилуй раба Твоего (имя), прости ему вся прегрешения его вольная и невольная, соблюди его невредима от всех козней вражиих; заступи его от всякаго нападения неприязненнаго, неизменно храни его в путех воли Твоея и во истине слова Твоего, благодатию Твоею восполняя всякое неможение или неведение его.

Ей, Владыко Христе, по многому Твоему снисхождению и крайнему человеколюбию, положивый и сего раба Твоего (имя) во еже приносити Тебе дары же и жертвы духовныя о людех Твоих, Духом Твоим Святым укрепи его в службу сию и даждь ему слово во отверзении уст его, во еже призывати благословение Твое на наследие Твое, и да почиет благоволение Твое на всем деле служения его.

О Боже, Боже наш, даждь и сему рабу Твоему нести в мир свидетельство о истине Твоей, и Сам Ты свидетельствуй о нем, якоже свидетельствовал еси в веках о святых Твоих апостолех и о наследницех их, отцех наших, яко да и в нем, и в служении его прославится всесвятое Имя Твое со Отцем и Духом Святым.

Мене же, недостойнаго раба Твоего, за молитвы служителя Твоего очисти от всякия скверны плоти и духа, и презирая вся моя беззакония и грехи, вразуми мя к познанию истины Твоея, не скрый от мене света заповедей Твоих, силою Твоею удержи мя в путех воли Твоея, и даждь ми все прочее время жизни моея совершити непорочно пред лицем неизреченныя славы Твоея, да не лишуся, по безумию моему, радости спасения Твоего и участия в наследии святых Твоих, от века Тебе благоугодивших.

Аминь.

Молитва четвертая

ГОСПОДИ БОЖЕ НАШ, создавый нас и введый в жизнь сию, показавый нам в безмерности благоволения Твоего к роду человеческому пути во спасение и даровавый нам откровение небесных тайн, и положивый в службу сию немощью плоти обложенных людей, сотвори милость Твою с рабом Твоим (имя), прости ему всякое согрешение его вольное и невольное, благодатию Твоею исцели всякое неможение его и светом познания Твоего свободи его от всякия тьмы неведения; Духом Твоим Святым утверди его во истине исповедания Твоего и в путех воли Твоея святыя и всесовершенныя. Даждь быти ему служителем Новаго Завета Твоего, слугою непостижимых Таинств Твоих; сотвори его достойна быти приносити Тебе жертвы духовныя о людех Твоих; всякое благое прошение его и молитву приими во святый и пренебесный Твой жертвенник, в воню благоухания, низпосылая благодать Святаго Твоего Духа, яко да и в нем прославится всесвятое и великолепое Имя Твое, Отца, и Сына, и Святаго Духа.

Аминь.

Молитва пятая

Иже неизреченных и невидимых тайн Боже, у Негоже сокровена суть источницы премудрости и разума, источницы силы и света; непостижимый во всех путех Твоих и делех, даждь ми, недостойнейшему всех человек, благословение Твое на службу мою, и за молитвы духовнаго отца моего, укрепи мя в служении сем. Ей, Господи, презирая вся моя беззакония и согрешения, вразуми мя к познанию истины Твоея и любви Твоея к человеку. Ты бо, Господи, умовением ног апостол Твоих давый нам образ служения ближнему, приими и мою малую и ничтожную службу сию, юже совершаю аз немощный по заповеди Твоей (отцу или матери моей, брату или сестре моей, или вообще страждущим и болящим), со всяким благоволением, и утверди мя в любви Твоей до конца. О Господи, помоги мне.

Аминь.

Молитва шестая

ГОСПОДИ ИИСУСЕ ХРИСТЕ, милостивый Спасителю наш, помилуй и спаси раба Твоего (имя) и за многое благоволение Твое излей на него благословение Твое.

Аминь.

МОЛИТВЫ ЗА УСОПШИХ

Прошения о усопших

ГОСПОДИ ИИСУСЕ ХРИСТЕ, Источниче жизни и безсмертия, милостивно приими усопшаго раба Твоего (имя), о надежде живота вечнаго почившаго, и не помяни грехов его, в житии сем приключьшихся ему, но да будет ответ его благоприятен на страшнем судищи Твоем; молим Ти ся, услыши и помилуй.

ВОСКРЕСЕНИЕ сый и живот всем верующим в Тя, Иисусе Христе, в вере и надежде воскресения усопшаго раба Твоего (имя) со святыми упокой; молим Ти ся, услыши и помилуй.

ГОСПОДИ ИИСУСЕ ХРИСТЕ, Кровию Твоею человеки искупивый, и смертию Твоею от смерти горькия избавивый род наш, во благости Твоей упокой усопшаго раба Твоего (имя), и вечныя славы Твоея причастника сего покажи; молим Ти ся, услыши и помилуй.

БОГОНАЧАЛЬНОЮ ВЛАСТИЮ живыми господствуяй и мертвыми обладаяй, Владыко Христе, преставльшагося раба Твоего (имя) упокой и неосужденнаго предстояния Престолу Твоему сподоби; молим Ти ся, услыши и помилуй.

ТЕРПЕНИЕМ и кротостию, упованием и любовию пожившаго на земли раба Твоего (имя), Христе, яже паче ума сияния славы Твоея сподоби, и лику возлюбленных Твоих сопричти; молим Ти ся, услыши и помилуй.

ЯКО АГНЦА, предвечно закланнаго за грехи мира, молим Тя, Христе, Кровию Твоею омый всякий грех усопших раб Твоих (имена), и силою Креста Твоего свобода я от всяких уз неприязни; молим Ти ся, услыши и помилуй.

ГОСПОДИ ИИСУСЕ ХРИСТЕ, силою Божественнаго Твоего еже из мертвых возстания, возведи души усопших раб Твоих (имена) ко причастию вечныя славы Твоея, и насладитися еже в Тебе непреложнаго мира сподоби я; молим Ти ся, услыши и помилуй.

ГОСПОДИ ИИСУСЕ ХРИСТЕ, аще и согрешаем в безумии нашем без меры и счета, но Ты, Свет безначальный и благости бездна сый, помилуй и ущедри нас, и даждь вечный покой усопшим отцем и братием нашим; молим Ти ся, услыши и помилуй.

БОЖЕ ОТЧЕ ВСЕДЕРЖИТЕЛЮ, основание сый всему сущему: и вечности, и времене, властию Твоею положивый пределы временнаго бытия нашего на земли, и в Сыне Твоем собезначальнем даровавый нам чрез воскресение безсмертную жизнь и Царство непреложное, помяни и раба Твоего (имя) в надежде воскресения и жизни вечныя усопшаго, и упокой его во Свете Лица Твоего; молим Ти ся, услыши и помилуй.

ОТЧЕ БЛАГИЙ и человеколюбивый, Боже, Боже наш, единаго преслушанием смерть вниде во вся человеки, Единаго же Господа нашего Иисуса Христа послушанием да внидет во вся ны оправдание жизни вечныя, и да разрешится ныне душа раба Твоего (имя) от всяких уз греховных, и оживится силою преславнаго Его воскресения; молим Ти ся, услыши и помилуй.

ГОСПОДИ ИИСУСЕ ХРИСТЕ, егоже явил еси равноангельна на земли, усопшаго раба Твоего (имя), самовластием слова украсив, ныне во стране живых всели, печали и попечения свободна, и причастника Божественныя Твоея жизни сего покажи; молим Ти ся, услыши и помилуй.

ОТЧЕ СВЯТЫЙ И БЛАГИЙ, якоже быхом наследницы смерти преступлением единаго праотца нашего, такожде яви нас быти наследники жизни вечныя правдою Единаго безгрешнаго Сына Твоего, Господа нашего Иисуса Христа, и подаждь вечный покой души усопшаго раба Твоего (имя), и сохрани ю во блаженней жизни, яже у Тебе; молим Ти ся, услыши и помилуй.

БОЖЕ СВЯТЫЙ, Иже во святых почиваяй, создавый человека по образу Твоему и по подобию, приими от уст нас грешных прошения сия о преставльшемся рабе Твоем (имя) и в безмерной благости Твоей презрев вся грехи его, даруй ему наследие нестареемыя жизни в Самом Христе Твоем, со всеми от века святыми; молим Ти ся, услыши и помилуй.

ГОСПОДИ БОЖЕ, Отче Вседержителю, Имене ради возлюбленнаго Сына Твоего, упования нашего, Иже даде Себе измену смерти, в нейже держими бехом, и есмы даже до ныне, продани под грехом, разреши тяжкия узы смерти нашея, сыны воскресения явлей нас, и в покоище Твоем, идеже вси святии Твои упокоеваются, упокой душу усопшаго раба Твоего (имя); молим Ти ся, услыши и помилуй.

ГОСПОДИ ИИСУСЕ ХРИСТЕ, Начальниче жизни нашея, перворожден из мертвых, на небеса возшедый, и седый одесную Бога и Отца, не воздаждь нам по делом нашим, но Кровию Твоею омый усопшаго раба Твоего (имя) от всякаго греха и, освятив его Духом Святым, сообразна сотвори его ныне образу славы Твоея в невечернем дни Царствия Твоего; молим Ти ся, услыши и помилуй.

ГОСПОДИ ИИСУСЕ ХРИСТЕ, Бог сый превечный, вся носяй глаголом силы Твоея, истощивый Себе даже до рабьяго зрака, и Крестом сошедый во ад, открывый путь воскресения всякой плоти, грехом умерщвленней и тлением содержимей, упокой душу усопшаго раба Твоего (имя), упование свое возложившаго на Тя, Творца и Бога, и Начальника жизни нашея; молим Ти ся, услыши и помилуй.

ГОСПОДИ ИИСУСЕ ХРИСТЕ, давый Себе измену смерти, и жизнь нетленную источивый нам из прободеннаго ребра Твоего, и ныне просим, из неистощимаго источника благости Твоея, излей на преставльшагося раба Твоего (имя), яко да и сей прославит Тя в веках грядущих и в Царстве непреемном; молим Ти ся, услыши и помилуй.

ПРИЗРИ, БОЖЕ, Содетелю наш, на немощь созданнаго Тобою естества нашего в падении нашем, помяни болезнь и скорбь нашу, труды и злострадания в мире сем, и презрев вся его прегрешения, силою воскресения Твоего возстави раба Твоего (имя) от тьмы и сени смертныя к лицезрению красоты Света Твоего невечерняго; молим Ти ся, услыши и помилуй.

ПОЧТИВЫЙ НЫ образом Твоим, яко создания руку Твоею, Спасе, в видимом зраце земнаго естества нашего умнаго существа Твоего живописал еси подобие, егоже и ныне общника яви усопшаго раба Твоего (имя), в нетленных селениях праведных учинив душу его; молим Ти ся, услыши и помилуй.

ХРИСТЕ ИИСУСЕ, крестную смерть прияти изволивый нашего ради спасения, да не ктому себе живем, но Тебе Единому, за ны умершему и преславно воскресшему, в измену разорившияся храмины тела, даждь ныне усопшему рабу Твоему (имя) нерукотворенную и вечную храмину на небесех, и да будет в нем все мертвенно пожерто огнем спасительнаго Твоего воскресения; молим Ти ся, услыши и помилуй.

Молитва

ГОСПОДИ ИИСУСЕ ХРИСТЕ, Боже Спасителю наш, соприсносущная Отцу содетельная Сило, неизреченнаго ради милосердия Твоего, еже к нам, и крайняго ради снизхождения, в плоть оболкийся, и приведый Себе о нас непорочное заколение, и сим неисповедимым и страшным священнодействием во ад сшедый, и неразрешимыя смерти узы расторгнувый, и во тьме седящим свет вечныя жизни явивый и восход лучший показавый, Сам и ныне, Христе, услыши молитву мою, недостойнаго раба Твоего, и душу усопшаго [новопреставленнаго] (имя) упокой.

Ты бо един еси рода смертнаго и безсмертнаго Содетель: Ты един еси Владыка, всю тварь десницею нетрудно содержай; Ты един еси воистину спасение миру и непостыдная надежда смертным жалом уязвленных; Ты един еси сведый до конца коегождо нас место и нужду, темже припадаем Тебе и смиренно вопием: не помяни грехов, ни беззаконий, и всякия иныя неправды, приключшейся рабу Твоему в житии сем, болезненном и многотрудном, и множеством милости Твоея душу его от всяких уз разреши, и всели ю в места светла, в места покоя безпечальнаго, и даждь ему нетленную радость со всеми от века святыми и праведниками воспевати преблагословенное Имя Твое, со Отцем и Святым Духом, во веки веков.

Аминь.

Келейные и богослужебные молитвы за усопших^[11]

БОЖЕ ВЕЛИКИЙ И ВЕЧНЫЙ, святый и человеколюбивый, сподобивый нас, недостойных рабов Твоих, в час сей стати пред Лицем Твоим и нечистыми устами призвати страшное и поклоняемое Имя Твое, приими посильное благодарение наше о Твоих великих благодеяниях, яже сотворил еси и не престаеши творити в нас. Велико бо воистину таинство Божественным Твоим повелением от небытия явления нашего в мир сей, неизследима глубина Твоего еже о нас смотрения, и временнаго зде пребывания и по сем вечнаго в Тебе упокоения.

МОЛИМ ТЯ, Всеблагий Создателю наш, помяни немощь естества нашего и еже от врага на всякий час бедственное поношение и попрание, несомое нами, призри благосердием на неизбывныя скорби и болезни, чрез все время живота нашего находящия на ны, наипаче же ужас и страх в час исхода смертнаго, и прости милостивно вся прегрешения усопшим рабом Твоим (имена), и упокой я во обителех, яже обещался еси уготовати веровавшим в Тя, Господи, и имена их в книзе животней неизгладимо напиши, телеса же совоздвигни в день, воньже определил еси по святым Твоим и неложным обетованиям. Несть убо, Господи, рабом Твоим смерть, но преставление от печальнейших на сладостнейшая. Аще бо и зело болезнен есть исход наш от телесе сего и страшен воистину час явления нашего пред неподкупным судом Твоим, обаче от труда и скорби на упокоение и радость преходим; и от суеты и мятежа к непрестающему видению славы Твоея возводимся.

ЕЙ, ГОСПОДИ, молим Тя, аще что согрешихом пред Тобою волею или неволею, вся прости: нам ли, до времене оставльшимся, онем ли, от жития сего преставльшимся; и сим убо свободу от всяких уз и покой сладкий ныне даруй, нам же зде сущим конец благий в покаянии и мире подаждь.

Ты бо еси Бог наш, Бог миловати и спасати, и Тебе славу возсылаем, Отцу и Сыну и Святому Духу, ныне и присно и во веки веков.

Аминь.

ГОСПОДИ ИИСУСЕ ХРИСТЕ, пребезначальнаго Отца собезначальне Сыне и Слове, неизреченнаго ради милосердия Твоего, все смотрение о спасении человеческом прекрасне исполнивый, и неразрешимыя смерти узы расторгнувый; приведый Себе о нас непорочное заколение, и Тело Твое пречистое и всякаго греха неприкосновенное за ны давый в жертву, и страшным сим и неисповедимым священнодействием живот вечный нам даровавый; во ад сшедый и во тьме и сени смертней седящим Божественный восход чрез воскресение показавый: Ты, Господи Иисусе Христе, Отца Вышняго Сыне возлюбленный, присносущныя славы Царю, услыши нас, молящихся Тебе, и упокой души от века усопших рабов Твоих, отец и братий, сестр и матерей, праотец и праматерей наших и прочих сродников по плоти, паче же присных по вере, и раба Твоего (имя), о немже память творим ныне. Яко в Тебе всех держава, и рукою Твоею содержиши вся концы земли: Ты един еси рода смертнаго и безсмертнаго Содетель, лета измеряяй живым и времена уставляяй смерти; низводяй во ад и паки возводяй; Сам убо, Христе, Владыко живых и мертвых, Спасителю наш и Надеждо всех, благоволивый приимати молитвенная воздыхания рабов Твоих, услыши нас, смиренных, и упокой душу раба Твоего (имя) в селениих праведных, во обителех света, идеже непрестанная радость зрящих Твоего Лица неизреченную славу, идеже немолчное славословие приносится Тебе, со безначальным Твоим Отцем и Всесвятым и благим и животворящим Твоим Духом, ныне и присно и во веки веков.

Аминь.

ВЛАДЫКО ХРИСТЕ, Боже великий и вечный, святый и человеколюбивый, сподобивый нас в час сей стати пред неприступною Твоею славою и сокрушенным сердцем принести Тебе благодарение о великих дарех, яже сотворил и непрестаеши творити в нас, молим Тя, помяни во благости Твоей крайнюю немощь естества нашего и низпосли на ны свышнюю силу Твою, да греховныя тьмы избежавше и оружием света Твоего оградившеся, неприступны будем всем кознем лукаваго, и со дерзновением чистым сердцем прославим Тебе, единаго истиннаго Бога. Велико бо воистину таинство Твоего о нас благоволения о временном на земли пребывании нашем, и по сем вечном в Тебе упокоении. Приими убо, многомилостиве Господи, благодарение сие наше о входех наших в мир сей и о исходех, о надежде нам воскресения и жизни нетленныя неложном обещании. Ты бо еси воскресения нашего Начальник, и поживших Судия человеколюбивый, и воздаяния Владыка всещедрый; Ты снисхождения крайняго ради приобщился еси преискренне плоти и крове, и тем совозвел еси нас в Твое Божественное безстрастие, приими убо в час сей молитвы и моления наша, и упокой отцы наша и матери, и чада, и братию, и сестры, и вся преждепочившия души, и раба Твоего (имя) ныне поминаемаго, во стране живых, в Царствии Небесном, в рай сладости, вводя вся во святыя Твоя обители, и имена их в книзе животней неизгладимо напиши, телеса же их воздвигни в день, в оньже определил еси святым Твоим и непреложным обетованием. Несть убо, Господи, рабом Твоим смерть, исходящим нам от тела и к Тебе Богу нашему приходящим, но преставление от печальнейших на сладостнейшая, и от труда и мятежа на упокоение и радость.

Аще же что согрешихом к Тебе, милостив буди нам же и ему, иже отиде от жития сего, зане ни един есть чист пред Тобою от скверн, кроме Тебе единаго безгрешнаго Господа нашего, от Негоже вси мы уповаем милость получити и оставление грехов. Сего ради, нам ли до времене оставльшимся, сему ли, преставльшемуся, остави и прости вся грехопадения вольная и невольная, яже в ведении и в неведении, в деяниих или в словесех, и во всех движениих наших, исповеданная, или забвенная, и отшедшему убо свободу и покой вечный даруй, нас же зде сущих благослови, таже кончину благую и мирную даруя нам и всем людем Твоим, и Царствия Твоего достойных всех нас сотвори.

Аминь.

СЫЙ, ВЛАДЫКО И ЦАРЮ всяческих, Христе Иисусе, зрак раба восприемый и с нами долу лежащими поживый, смертию же крестною в преисподняя снизшедый, и во тьме и сени смертней заключенныя и под стражею адовою содержимыя преславным Твоим воскресением возставивый, услыши нас, смиренных, молящихся Тебе, и упокой души рабов Твоих, (имена) и всех от века почивших отец и братий, сестр и матерей, праотец и праматерей наших, сродников наших по плоти даже до перваго рода, наипаче же присных по вере, идеже вся святии Твои пребывают и упокоеваются.

Ты бо еси содержай вся концы земли и наполняяй бездны; Ты един еси Владыка живых и мертвых, лета измеряяй живота и времена полагаяй успению коегождо; Ты еси един, сведый место всякаго создания Твоего, и низходящия во ад тяготою грехов милостивно возводиши к животу и Свету невечернему, темже молим Тя: упокой рабы Твоя (имена) в селениих праведных, идеже радость непреложная и веселие непрестанное зрящих Твоего Лица доброту превожделенную, идеже немолчное славословие приносится Тебе, со Отцем и Духом Святым, во веки веков.

Аминь.

ГОСПОДИ, БОЖЕ НАШ, сердцем сокрушенным и смиренным приносим Тебе малое и недостойное моление о рабе Твоем усопшем (имя) [зде прахом почивающем]. Услыши нас, и упокой душу его во стране живых, в недрех Авраама, Исаака, и Иакова.

Аще же что согреши раб Твой яко человек в животе своем, Ты же, Господи, яко Бог, вся прости ему, зане ни един человек обретается чист пред Тобою от скверны и всякаго инаго беззакония. Ты точию, Господи, един сый свят по естеству и освящаяй всякое создание Твое, и Тебе подобает всякая слава, честь и поклонение, Отцу и Сыну и Святому Духу, ныне и присно и во веки веков.

Аминь.

Прошения о усопших священнослужителях

ГОСПОДИ ИИСУСЕ ХРИСТЕ, рекий пречистыми усты Твоими: аще кто Мне служит, почтит его Отец Мой, и идеже Аз, ту и слуга Мой будет, ныне убо благосердием Твоим приими преставльшагося раба Твоего и служителя (имя) и упокой его, идеже вси от века во истине Тебе послужившия, и по неложному Твоему обетованию неизменнаго еже с Тобою пребывания сего сподоби; молим Ти ся, услыши и помилуй.

ГОСПОДИ ИИСУСЕ ХРИСТЕ, присносущнаго Отца соприсносущная Премудросте и Сило, по непостижимому еже к нам благоволению Твоему животворящая и спасительная страсти за ны понесый, и погребением Твоим адова пленивый царства, милостивно приими ныне раба Твоего и служителя, преставльшагося (имя), и помяни верное служение его, еже во всяком терпении, в скорбех и ранах, в изгнаниях, теснотах и лишениях раб Твой (имя) соверши, и воздаждь ему сторицею в невечернем дни Царствия Твоего; молим Ти ся, услыши и помилуй.

ГОСПОДИ ИИСУСЕ ХРИСТЕ, Владыко всех и Царю, царское священие даровавый на земли рабу Твоему и служителю преставльшемуся (имя), и ныне милостивно сего приими, и неизреченнаго пред Престолом славы Твоея прсдстояния с небесными умными силами, пророками, апостолами и святительми сподоби; молим Ти ся, услыши и помилуй.

ИИСУСЕ ХРИСТЕ, Царю царствующих и Господь годсподствующих, едине Святый, со святыми упокой от жития сего преставльшагося раба Твоего (имя) и наследие нестареемыя жизни, яже в Тебе сему даруй; молим Ти ся, услыши и помилуй.

ГОСПОДИ ИИСУСЕ ХРИСТЕ, пришествием, еже во плоти, началозлобнаго убийцу низложил еси, и славным воскресением Твоим нетленныя жизни свет роду человеческому даровал еси, усопшаго раба Твоего (имя) со избранными Твоими во светлостех святых Твоих упокой; молим Ти ся, услыши и помилуй.

ГОСПОДИ ИИСУСЕ ХРИСТЕ, во дни плотскаго Твоего еже с нами пребывания и мироискупительныя страсти ко Отцу Твоему воззвавый: Отче Святый, ихже дал ecu Мне, хощу, да идеже, Аз, и тии будут со Мною, да видят славу Мою, юже дал ecu Мне, яко возлюбил Мя ecu прежде сложения мира, милостивно ныне приими преставльшагося раба Твоего и служителя (имя), и нетленныя славы Твоея причастника сего покажи; молим Ти ся, услыши и помилуй.

ГОСПОДИ ИИСУСЕ ХРИСТЕ, рекий пречистыми усты Твоими: аминь, аминь, глаголю вам, яко слушаяй словесе Моего и веруяй Пославшему Мя имать живот вечный, и на суд не приидет, но прейдет от смерти в живот, умилосердися ныне о преставльшемся рабе Твоем (имя) и в славу небесную и нескончаемую сего приими; молим Ти ся, услыши и помилуй.

РАБА ТВОЕГО (имя), егоже преставил еси от временных, лепоты Твоея сиянием озаритися благоволи, Христе, Спасе наш, и благости Твоея неизреченным богатством душу его веселием неотъемлемым возвесели; молим Ти ся, услыши и помилуй.

ГОСПОДИ, БОЖЕ НАШ, Егоже слава неизреченна и милость безмерна, Егоже царство непреемно и владычество непреложно, в вере и надежде усопшаго раба Твоего (имя) в рай сладости упокой, и душу его со всеми от века Тебе благоугодившими всели; молим Ти ся, услыши и помилуй.

ГОСПОДИ СИЛ, скорбящих радосте, и плачущих истинное утешение, и всех в малодушии сущих державное заступление сый, милостию и щедротами Твоими посети сокрушенныя рабы Твоя, и всяку болезнь в сердцах их исцели: раба же Твоего (имя) в надежде воскресения усопшаго в недрех Авраамлих упокой, и лику спасенных Твоих сопричти; молим Ти ся, услыши и помилуй.

Молитва

БОЖЕ, Боже наш, иже всем человеком жития предел положивый, и время исхода из мира сего определивый во благом Твоем промышлении о всех нас: молим Тя, Всеблагий, усопшаго раба Твоего (имя) милостивно приими, и якоже на земли в Церкви Твоей служителя Престолу Твоему явил еси и совершителя святых Твоих Тайн поставил еси, тако и ныне, в пренебеснем Твоем жертвеннице сослужителя горних чинов того покажи; и якоже в человецех духовным достоинством сего украсил еси, тако и ныне, в собор святых неосужденна того вчини; и якоже зде живот его даром священства прославил еси, тако и ныне, Сам Ты, Господи, прославлявшаго Тя, славою вечною на небеси прослави, и дух его со всеми от века Тебе благоугодившими совокупи в невечернем дни Царствия Твоего, Христе: Ты бо еси воскресение, и живот, и покой всех возлюбльших пришествие Твое, и Тебе славу возсылаем со Отцем и Святым Духом, ныне и присно и во веки веков.

Аминь.

МОЛИТВЫ НА РАЗНЫЕ СЛУЧАИ ЖИЗНИ

Молитвы на освящение автомобиля

Молитва первая

ГОСПОДИ ИИСУСЕ ХРИСТЕ, благословляяй и освящаяй всяческая молитвою и призыванием всесвятаго Имене Твоего, благослови колесницу сию, юже раб Твой (имя) стяжа, и да будет сия ему во благую потребу, в служение нуждам его и ближних.

Ей, Господи, приклони ухо Твое и услыши нас в час сей, и благословением Твоим сохрани раба Твоего и всякаго инаго, ею пользующегося от всякаго сопротивнаго обстояния и всякаго вреда человеком ли, или скотом.

Твое бо есть еже миловати и спасати ны, Боже наш, и Тебе славу возсылаем со Отцем и Святым Духом, всегда, ныне и присно и во веки веков.

Аминь.

Молитва вторая

ГОСПОДИ, БОЖЕ НАШ, безначальне, блаже, Содетелю всех и Творче всего сущаго, Едине Святе, Едине по существу безгрешне, научивый ны Божественным Твоим словом почитати вся Тобою созданная добра быти, и заповедь давый праотцем нашим, еще в рай сущим, возделывати ея, молим Тя, Владыко Святый, призыванием всесвятаго Имене Твоего и окроплением воды сея священныя, благослови колесницу сию, юже стяжа раб Твой (имя), и даждь ему надежду, яже о Тебе, и сохрани его от всякия беды и напасти пользующемуся и всякому иному живому существу, Тобою созданному. Ты бо еси Бог всяческих, Ты един еси Хранитель Святый и Заступник державный, и Тебе славу вси возсылаем, ныне и присно и во веки веков.

Аминь.

Молитва на благословение иконы спасителя

СЫЙ БОЖЕ ОТЧЕ, Вседержителю покланяемый, достойно есть яко воистинну, и праведно, и лепо великолепию святыни Твоея Тебе кланятися и Тебе славити, Единаго воистинну Сущаго Бога; безначальне, непостижиме, неописанне, неизменне, призри милостивно на ны и на образ сей Единороднаго Твоего Сына, Иже сый сияние славы Твоея и существа Твоего неизменное начертание носит вся глаголом силы Своея; и Бог сый превечный на земли явися, и от Девы Святыя воплощься истощи Себе, зрак раба приемь, сообразен быв телу смирения нашего, да нас сообразны сотворит образу славы Своея; Иже даде Себе измену смерти, сошед Крестом во ад, и воскрес в третий день, и возшед на небеса, седе одесную величествия Твоего на высоких. Сего ради, Отче Всесвятый, и мы, смиреннии раби Твои, сотворихом сей образ возлюбленнаго Христа Твоего, и просим, и молим Тя: благоволением благости Твоея, низпосли Духа Твоего Святаго на икону сию, во еже благословити и освятити ю, яко да вси молящии пред нею услышани будут от Тебе, и приимут небесное Твое благословение, и благодать Святаго и животворящаго Твоего Духа, и освящение Единороднаго Твоего Сына.

Яко Ты еси освящение наше, и Тебе славу возсылаем, ныне и присно и во веки веков.

Аминь.

Молитвы на благословение дома

Молитва первая

УПОВАНИЕ НАШЕ, ХРИСТЕ, заповедь давый учеником Твоим: егда входити в дом, призывати мир Твой на него, и на всех живущих в нем, Сам Всеблагий, низпосли мир Твой на рабы Твоя (имена), зде обитающих и Тебе нами недостойными мольбы и моления приносящия. Ей, Владыко Христе, услыши нас ныне и милость Твою богатую излей на вся ны. Ты бо веси вся скорби наша и немощь естества нашего. Темже не посрами нас, надежду нашу на Тя Единаго возложивших и инаго заступления в мире сем кроме Тебе не имущих. Буди нам покров и ограждение, покой и радование, мир и крепость, спасение и освящение. Ты бо еси Бог наш, и Тебе славу возсылаем на всяк день, со Отцем и Святым Духом, всегда, ныне и присно и во веки веков.

Аминь.

Молитва вторая

ГОСПОДИ, ИИСУСЕ ХРИСТЕ, Спасителю наш, во дни плотскаго Твоего пришествия и пребывания с нами изволивый внити под сень Закхееву и спасение тому и всему дому его бывый: Сам, всеблагий наш Господи, и ныне благослови всех зде живущих рабов Твоих и благодатию Твоею неотступно пребуди с ними во вся дни живота их, и соблюди их невредимы от всякаго навета вражия, даруя им мир Твой, Господи, якоже и святым Твоим апостолом. Твое бо есть еже миловати и спасати нас, Христе Боже наш, и Тебе славу возсылаем со Отцем и Святым Духом, ныне и присно и во веки веков.

Аминь.

Молитва на построение и освящение дома

ГОСПОДИ ИИСУСЕ ХРИСТЕ, един сый воистину краеугольный Камень, на немже зиждется всякая жизнь, призри милостивно на рабы Твоя (имена), изволившия в надежде на Тя воздвигнута дом сей в жилище себе, и в державе крепости Твоея основай его на твердом камене, Иже основавый землю на тверди ея, яко да ни ветр, ни вода, ни огонь, ни гроза, ни оружие бранное, ни землетрясение, ни ино что поколебати или повредити возможет и.

Благоволи же, Христе, упование наше, в богатстве милости Твоея, строение сие в конец благополучно привестися, и на рабов Твоих сих, хотящих в нем жити, благословение Твое низпосли, и щедроты Твоя обильно излей. Даждь же им и Ангела мирна, храняща их от всякаго навета сопротивнаго во вся дни живота их.

По исходе же их из мира сего, во времена, ихже положил еси во власти Твоей, егда отложити им телесную сию храмину, приими их во обители светлыя дому Отца Твоего по обетованию Твоему, и насладитися еже в Тебе непреложнаго мира и радости нетленныя сподоби.

Ты бо еси покров нам, прибежище, и сила, и Тебе славу возсылаем, со Отцем и Святым Духом, во веки веков.

Аминь.

Молитва о единстве для семьи или прихода

ГОСПОДИ ИИСУСЕ ХРИСТЕ, Агнче Божий, вземляй грех мира, восходом Твоим на Голгофскую Гору искупил еси ны от клятвы законныя и восставил еси Твой падший образ, на Кресте пречистеи руце Твои прострый, да чада Божия расточенная собереши во едино, и ниспосланием Пресвятаго Духа в соединение вся призвавый, Ты убо, Сый Отчее сияние, перед исходом Своим на сие великое мироискупительное священнодействие, молился еси Отцу Твоему, да будем вси едино, якоже Ты един еси со Отцем и Духом Святым, даждь убо нам благодать и мудрость исполнити сию заповедь на всяк день, и укрепи нас на подвиг тоя любве, юже заповедал еси нам, рекий: да любите друг друга, якоже возлюбих вы. Духом Твоим Святым даждь нам силу смирятися друг перед другом, поминая, яко аще кто больше любит, той и больше смиряется; научи нас молитися друг за друга, нести тяготы друг друга в терпении и объедини нас союзом любве неразрушимыя во едино стадо послушных овец о Имени Твоем святем, даруя нам и зрети в коемждо брате и сестре нашей образ Твоея неизреченныя славы и не забыти, яко брат наш есть наша жизнь.

Ей, Господи, собравый нас благоволением Твоим, сотвори нас быти воистину во едину семью, живущую единым сердцем, единей волей, единей любовию, яко един человек, по предвечному совету Твоему об Адаме первороднем. Осени дом наш (или приход наш) Духом страха Твоего, и покрый его покровом Пречистыя Твоея Матере и всех святых Твоих, благословляяй и заступаяй коегождо зде живущих (имена), сохраняя же нас всех от тлетворных помыслов, от неподобающих слов или движений сердечных, могущих разрушити священное дело нашего служения, яко да созиждется дом сей (приход сей) на камне евангельских Твоих заповедей местом исцеления, освящения и спасения, ради нас самих и ради всех притекающих семо, труждающихся и обремененных братьев и сестер наших, да обрящем вси покой в Тебе, кротком и смиренном Царе нашем, ныне и присно и во веки веков.

Аминь.

1

Архимандрит Софроний. Письма в Россию. Москва-Эссекс, 1997. С. 55-56

2

Там же. С. 58-59.

3

Там же. С. 57.

4

Там же. С. 61-62.

5

Там же. С. 56-57.

6

Там же. С. 59.

7

Старец Софроний так пишет о написанной им «Утренней молитве»:

«Если просто читать эту молитву, то, быть может, довольно и пяти минут, но если читать ее с умилением, с глубоким чувством покаяния и плачем сердечным, чтобы возросло ее спасительное действие, то потребуется гораздо большее время. Лично у меня, на такую молитву уходило не менее часа, а иногда даже и до двух часов. Тогда каждое из этих слов живется с глубоким проникновением в его подлинный смысл и значение. Пребыв в атмосфере этой молитвы хотя бы час, мы увидим, что дух этой молитвы как бы сгущается вокруг нас и становится силою, сохраняющею нас в течение дня от всякого вредного влияния, извне находящего на нас. А если совершится и большее сего, то есть, к нам прикоснется Перст смиренного Бога нашего, — то человек исходит из пределов этого мира и причащается мира Божественного.

Когда с нами случится подобное, тогда мы рождаемся для вечного Царства Отца и Бога нашего, и уже все земные положения, какими бы они ни были высокими, или, напротив, низкими и сокрушающими нас, утрачивают свою губительную силу, и всякая рана от прошлого излечивается. Тогда человек освобождается от всякого погружающего в отчаяние чувства: будь то ощущение своего собственного ничтожества или же самое душепагубное самомнение превосходства.

Когда же душа, по дару благодати Святого Духа, познает Христово нетварное смирение, тогда, покидая тело, воспринятая в любящие объятия Отчии, она забудет свое земное происхождение...»

8

Молитву «СЫЙ ВЛАДЫКО БОЖЕ» ИЗ Литургии Святого Василия Великого старец Софроний всегда читал на великом входе, при перенесении Святых Даров на Престол. В заключительных ее словах, его собственных, он выразил свое глубокое видение литургического акта:

«Как Христос очищение есть о гресех наших, не о наших же точию, но и о всего мира (1 Ин. 2, 2), так Божественная Литургия, являясь космическим, всеобъемлющим актом, приносится за грехи всего мира. Через литургическую молитву наше сознание предельно расширяется, и по мере нашего проникновения в эту тайну, мы становимся способными вместить “всех и вся”, и подобно распятому Христу, обнять все концы “сердцем сокрушенным и духом смирения”. Тогда человек перестает быть ограниченным, замкнутым в себе индивидом, но подобно новому Адаму — Христу, он носит в себе всех людей, усопших, живых и грядущих, и становится действительно универсальным. В этом состоянии, когда молитва за всего Адама является подлинным состоянием нашего существа, старец видел последнее совершенство призвания во Христе.»

9

Молитву «ОТЧЕ СВЯТЫЙ» старец Софроний обычно читал на Литургии во время пения «ТЕБЕ ПОЕМ» перед освящением Святых Даров.

10

К настоящим духовническим молитвам старец Софроний приписал:

«Служение духовника неизреченно велико по цели своей. В сущности, исполняя свою службу, якоже подобает, в духе покаяния и в смирении, духовник является сотрудником Бога в творении бессмертных богов. И как в литургическом служении нашем, сознавая свою недостаточность, иерей произносит слова: “Никтоже достоин” — так и для духовнического служения, верно понятого, “никтоже доволен” сам собою. Отсюда необходимо, и утром, и вечером перед сном, читать эту молитву, чтобы дух сей молитвы пребыл с нами во все время служения нашего.»

11

В рукописи этих молитв старец Софроний сделал на полях следующую заметку:

«Эти молитвы мы приносим Богу во время богослужений, если мы одни у себя, на могилах усопших, в наших личных предстояниях пред Господом, при гробах в домах, еще до погребения в храме и подобное.»

Больше книг на Golden-Ship.ru